Nvidia RTX 20 - 40 videokartlarının AI sürət kilidini açan alət təqdim…

    “Nvidia” videokartları üçün hazırlanmış “nv-uefi-unlocker” adlı yeni açıq mənbəli UEFI aləti süni intellekt hesablamalarının sürətinə qoyulan məhdudiyyəti aradan qaldırır. Alət “RTX 20”, “RTX 30” və “RTX 40” seriyalarında işləyir. USB yaddaşdan açılır və həm “Windows”, həm də “Linux” sistemlərinə uyğundur. Tərtibatçının “RTX 4060 Laptop” videokartı ilə apardığı sınaqda FP16 hesablamalarında 65 faiz artım qeydə alınıb.

    Alət əməliyyat sistemi “Nvidia” drayverini yükləməzdən əvvəl, UEFI mərhələsində işə düşür. Buna görə videokartın VBIOS proqramını yeniləməyə və dəyişdirilmiş drayver quraşdırmağa ehtiyac qalmır. “V67” faylı imzalanmış “Booter” mikroproqramındakı yazma kilidini açır. Nəticədə süni intellekt hesablamalarını sürətləndirən tenzor blokları tam gücü ilə işləyir. Yazılan dəyişikliklərin yenidən oxunub yoxlanması əvvəlki sınaq versiyaları ilə müqayisədə təhlükəsizliyi artırır.

    Yükləmə paketində “Nvidia” mikroproqramı yoxdur. Paketə yalnız skriptlər və layihənin hazırladığı icra faylları daxildir. Skript şirkətin açıq yayımlanan 610.43.03 drayver paketini endirir, yoxlayır və lazım olan faylları kompüterdə yenidən hazırlayır. İstifadəçi bu faylları “BOOTX64.EFI” ilə birlikdə FAT32 formatlı USB yaddaşa köçürməlidir. Alət birdəfəlik açılış menyusundan başladılır. İstifadəçi 30 saniyə ərzində boşluq düyməsini basaraq əməliyyatı təsdiqlədikdən sonra sistem normal qaydada açılır.

    Kompüter UEFI rejimində işləməlidir. “Secure Boot” ya söndürülməli, ya da öz imzası olan EFI faylına etibar edəcək şəkildə qurulmalıdır. Alət “Secure Boot” tələb edən oyunların fırıldaqçılığa qarşı müdafiəsini keçə bilmir. “RTX 20” sahibləri əvvəlcə “Windows” drayverini GSP mikroproqramı rejiminə keçirən skripti 1 dəfə işə salmalıdırlar. Noutbuklarda ayrıca “Nvidia” videokartını aktiv saxlayan dGPU və ya MUX rejimi məsləhət görülür. “Ubuntu” kimi “Linux” sistemlərində enerjiyə qənaət funksiyası videokartı boş vaxtda söndürə bilər. Bu halda kilidin açılması ləğv olunur.

    Uyğunluq siyahısına görə, “RTX 30” seriyasının hamısı dəstəklənir. “RTX 40” seriyası da həm masaüstü kompüterlərdə, həm də noutbuklarda işləyir. “RTX 20” ümumilikdə dəstəklənsə də, “RTX 2080”, “RTX 2080 Ti” və “RTX 2080 Super” açılış zamanı xəta verə bilər. “GTX 16” nəzəri cəhətdən işləyə bilər, amma bu, hələ təsdiqlənməyib. Turing-dən əvvəlki köhnə kartlar, “GA100” və “RTX 50” seriyası dəstəklənmir. Səbəb “RTX 50” seriyasında təhlükəsizlik tədbirlərinin daha sərt olmasıdır.

    Sınaqda “RTX 2070” FP16 matris hesablamasında əvvəlcə 36 TFLOPS göstərib. Kilid açıldıqdan sonra nəticə 60-63 TFLOPS olub. “RTX 4080” əvvəlcə 100,37 TFLOPS nəticə göstərib. Sonradan bu göstərici 192,18 TFLOPS-a çatıb. TFLOPS saniyədə neçə trilyon hesablama aparıldığını göstərir. Lakin sınaq üsulları fərqli olduğuna görə videokartları yalnız bu rəqəmlərlə birbaşa müqayisə etmək olmaz. Nəticələr enerji sərfiyyatı və temperatur hədlərindən də asılıdır. Kilid kompüter hər dəfə açılanda yenidən götürülməlidir. Güc limitini artıran əlavə üsullar zavodun qoyduğu enerji və temperatur hədlərini aşa bilər.