PS5 oyunlarını PC-yə uyğunlaşdıran AnyPS5 bütün qrafik əmrləri tanıyır

    Açıq mənbəli “AnyPS5” layihəsi “PlayStation 5” oyunlarını “Windows” və “Linux” sistemlərində birbaşa işlətmək yolunda vacib mərhələyə çatıb. Layihə qrafik prosessoru üçün yazılan shader əmrlərinin 100%-ni tanıyır. RDNA 1 və RDNA 2 üzrə bütün 1 166 təlimat tanınır. Ancaq bu, oyunların artıq problemsiz işlədiyi demək deyil.

    Hər hansı təlimatın layihəyə əlavə olunması hələlik shader dekoderinin onu tanıdığını göstərir. Təlimatın SPIR-V formatına düzgün çevriləcəyinə və hər vəziyyətdə gözlənilən nəticəni verəcəyinə zəmanət yoxdur. Məsələn, “libSceHttp” kitabxanasının 95% hazır olduğu göstərilir. Buna baxmayaraq, hazırkı versiyada HTTP sorğuları internetə çatmır.

    “AnyPS5” adi konsol emulatorundan fərqli işləyir. Layihə hazır oyun kodunu kompüterdə işləyəcək formaya uyğunlaşdırır. Standart ELF formatındakı oyun faylı 64 bitlik x86 “Linux” ELF və ya “Windows” PE faylına çevrilir. Bunun üçün oyunun ilkin proqram kodu lazım deyil. Oyunun gözlədiyi sistem kitabxanaları kompüterdə işləyən alternativlərlə əvəz olunur. Prosessor kodu uyğun kompüterdə birbaşa işləyə bilir, bəzi AMD təlimatları da “Intel” prosessorlarına uyğunlaşdırılır.

    Əsas çətinlik qrafika hissəsindədir. Buna “Sony”nin AGC interfeysi və RDNA shader təlimatları daxildir. “AnyPS5” shader proqramlarını “Vulkan” qrafika sistemi ilə işlətmək üçün SPIR-V formatına çevirir. Elan olunan 3 044 sistem kitabxanası funksiyasından 2 578-i işlək hala gətirilib. Bu, ümumi funksiyaların 84,69%-i deməkdir. Qrafika, teksturalar, sinxronizasiya, yaddaş, səs və başqa xidmətlər üzərində iş davam edir.

    Rəsmi uyğunluq siyahısında tam oynanıla bilən yeganə oyun “Dreaming Sarah”dır. Bu, texniki baxımdan sadə 2D platformer oyunudur. Daha güclü kompüter tələb edən “Ghost of Yotei”də də irəliləyiş var, amma qrafika, sabitlik və sürətlə bağlı problemlər qalır. Oyunun giriş hissəsinin və ya ilk 3D səhnəsinin açılması onun tam oynanıla bildiyini göstərmir.

    “AnyPS5” diskdəki oyunu birbaşa kompüterə köçürmür və şifrəni açmaq üçün alət vermir. İşə başlamaq üçün əvvəlcədən çıxarılmış ELF faylı, oyun modulları, resurslar və uyğunluq kitabxanaları lazımdır. “Windows”da bəzi oyunlar 13 824 MB, yəni 13,5 GB birbaşa yaddaş istəyə bilər. Buna görə 16 GB RAM və kiçik səhifələmə faylı olan kompüterlər kifayət etməyə bilər.

    “AnyPS5” üzərində 100-dən çox insan çalışır. İş zamanı “Claude” dəstəyindən də yararlanırlar. Layihənin gələcəkdə bütün oyunları işlədən universal emulatora çevrilməsindən çox, ayrı-ayrı oyunların qeyri-rəsmi PC versiyalarını hazırlamaq üçün platforma olması daha real görünür. Bununla belə, hüquqi qeyri-müəyyənliklər qalır. Geniş oyun dəstəyi üçün də hələ çox iş görülməlidir.