Samsung Dynamic Island-a bənzər bildiriş dizaynını sınaqdan keçirir
Proqram Təminatı
22.11.2026
“Samsung” “One UI 9.5” interfeysində “Live Notifications” funksiyasının yeni görünüşünü sınaqdan keçirir. Bildiriş sahəsi ekranın yuxarı hissəsində, mərkəzdə görünür və “Apple”ın “Dynamic Island” həllini xatırladır. Funksiya hazırda beta proqramında “Galaxy S26” seriyası üçün sınaqdan keçirilir və yalnız seçilmiş ölkələrdə açıqdır.
“Samsung” bu funksiyanı ilk dəfə “One UI 7” ilə çıxarmışdı. Hazırkı versiyada bildiriş ekranın yuxarı sol küncündə kiçik kapsul kimi görünür. Burada taymerin qalan vaxtı və ya səs yazısının davam etdiyini göstərən işarə çıxır. Açıq tətbiqlər arasında keçmək üçün kapsulun üzərində yuxarı və ya aşağı sürüşdürmək olur.
Yeni dizaynda kapsul ekranın yuxarı mərkəzinə keçir, idarəetmə qaydası da dəyişir. Müxtəlif əməliyyatlar arasında keçmək üçün sola və ya sağa sürüşdürmək kifayət edəcək. Bildiriş sahəsini əvvəlcədən böyütməyə də ehtiyac qalmayacaq. Görünüş hələ sınaq mərhələsində olduğuna görə yekun dizayn və idarəetmə qaydası dəyişə bilər.
“Samsung” yeni variantı çıxarsa, funksiyanın “Galaxy S27” seriyasında görünəcəyi gözlənilir. Həmin telefonların sabit “One UI 9.5” interfeysi ilə satışa çıxacağı ehtimal olunur. Ancaq “Dynamic Island”a bənzər həll Android telefonları üçün yenilik deyil. Bəzi Çin istehsalçıları daha əvvəl oxşar bildiriş sahələri hazırlayıblar.
Şərhlər
Şərh yazmaq üçün Google və ya Facebook hesabınızla daxil olun.
Şərhlər yüklənir...