Windows 11-də sürətli bərpa funksiyası istifadəyə verilib

     Microsoft şirkətinin tərtibatçıları Windows 11-ə yeni bir rejim - Quick Machine Recovery (QMR) əlavə ediblər. Bu rejim kompüterin yüklənməsi ilə bağlı müxtəlif problemləri həll etməyə kömək edəcək. Yenilik sayəsində cihaz WinRE bərpa rejimində yüklənir, daha sonra Microsoft serverləri ilə internet bağlantısı qurulur və oradan yükləmə zamanı geniş yayılmış problemləri aradan qaldırmaq üçün lazımi xəta düzəlişi endirilir. Microsoft QMR rejimini ilk dəfə ötən ilin sonunda elan etmişdi. Bu rejim, şirkətin 2024-cü ilin ortalarında CrowdStrike xidmətlərində baş vermiş genişmiqyaslı nasazlıq kimi halların qarşısını almaq üçün atdığı addımlardan biridir.

     Həmin hadisədə təhlükəsizlik məhsullarından birinə edilmiş səhv yeniləmə nəticəsində milyonlarla Windows əsaslı kompüter və server sıradan çıxmışdı. QMR rejimi, sistemin normal şəkildə işə düşə bilmədiyi hallarda belə, yeniləmələrdəki səhvləri aradan qaldırmaq üçün xəta düzəlişlərinin kütləvi şəkildə yayılmasına imkan verəcək. Hazırkı mərhələdə QMR rejimi yalnız Windows Insider proqramının ilkin sınaq iştirakçıları üçün əlçatandır və Windows 11-in Canary kanalındakı beta versiyalarında istifadəyə verilib. Bu isə o deməkdir ki, Microsoft hələ də bu rejimi test edir və kütləvi istifadəyə tam hazır deyil. QMR rejimi Windows 11-in 27898 nömrəli sınaq versiyasında mövcuddur.

     Bu versiyada əlavə olaraq Taskbar-dakı elementlərin ölçüsünün avtomatik kiçildilməsi funksiyası da tətbiq olunub ki, bu da çoxlu sayda tətbiqlər işə salındıqda faydalı ola bilər. Tərtibatçılar həmçinin tətbiqin veb kamera və ya mikrofon icazəsi tələb etdiyi zaman görünən pəncərənin vizual görünüşünü dəyişiblər. Bundan əlavə, istifadəçilər artıq mətnə çevirmə üçün nəzərdə tutulmuş daxili nitq tanıma sisteminin lüğətinə öz sözlərini əlavə edə biləcəklər. Bütün bu yeniliklərin Windows 11-in stabil versiyasında nə zaman əlçatan olacağı hələ məlum deyil. Böyük ehtimalla, onların bəziləri bu ilin payızında yayımlanacaq Windows 11 25H2 adlı böyük yeniləmənin tərkibinə daxil ediləcək.