Bir neçə gün bundan öncə məlumat ortaya çıxmışdı ki, Microsoft şirkəti süni zəka əsaslı ChatGPT çat-botunu özünün Bing axtarış sisteminə inteqrasiya etməyi nəzərdən keçirdir. İndi isə verilmiş yeni məlumata əsasən şirkət həmçinin sözügedən çat-botu özünün ofis tətbiqlərinə inteqrasiya etməyi və bununla da istifadəçilərə ofis tətbiqləri çərçivəsində yeni funksiyaları təqdim etməyi planlaşdırır. Məsələn istifadəyə veriləcək funksiyalardan biri şirkətin ofis tətbiqlərində ChatGPT alqoritmi sayəsində istifadəçilərə sənədlərin sürətlə tərtib edilməsində yardımçı ola bilər. The Information saytının verdiyi məlumata əsasən şirkət süni zəka tərəfindən emal ediləcək səsli əmrlər vasitəsilə Outlook üzərindən axtarış funksiyasını reallaşdırmağı nəzərdən keçirdir.

    Bu halda Outlook üzərindən axtarış prosesində açar sözlərdən istifadə etməyə ehtiyac qalmayacaq. Bununla yanaşı Outlook və Word elektron məktublar üçün avtomatik şəkildə sürətli cavabların tərtib edilməsi imkanını və sənədlərə müxtəlif dəyişikliklərin əlavə edilməsi üzrə məsləhət sistemini əldə edə bilərlər. ChatGPT-nın dəqiq şəkildə növbəti MS Office versiyasına inteqrasiya edilib-edilməyəcəyi bilinmir. Ola bilər ki, şirkət hal hazırda sadəcə olaraq bu cür imkanı nəzərdən keçirdir. Qeyd etmək lazımdır ki, 2019-cu ildə Microsoft ChatGPT-nı yaratmış OpenAI təşkilatın 1 milyard dollar investisiya yatırmışdı. Bir neçə gün bundan öncə isə məlumat ortaya çıxdı ki, şirkət təşkilata əlavə 10 milyard dollar investisiya yatırmağı nəzərdən keçirdir.