ABŞ federal əməkdaşlarına iş telefonlarında TikTok-a yenidən icazə verildi

    ABŞ Ədliyyə Nazirliyi federal dövlət qurumlarında çalışan əməkdaşların xidməti telefonlarına yenidən TikTok tətbiqini yükləyə biləcəyini açıqlayıb. Reuters-in məlumatına görə, bu qərar TikTok-un ABŞ əməliyyatlarının yeni ortaq müəssisəyə ötürülməsindən sonra qəbul edilib. Xatırladaq ki, 2022-ci ildə qəbul edilən qanuna əsasən, federal əməkdaşlara təhlükəsizlik səbəbləri ilə TikTok-u hökumətə məxsus cihazlarda istifadə etmək qadağan edilmişdi. Lakin Ədliyyə Nazirliyi hesab edir ki, tətbiqin ABŞ-dəki fəaliyyət modelinin dəyişməsi ilə həmin qanun artıq əvvəlki formada tətbiq olunmur.

    Yeni razılaşmaya əsasən, TikTok-un ABŞ əməliyyatları Oracle, Silver Lake və MGX tərəfindən dəstəklənən birgə müəssisəyə verilib. Oracle bu strukturda təhlükəsizlik tərəfdaşı kimi çıxış edəcək, əvvəlki sahibi ByteDance isə şirkətdə 19,9 % payını saxlayacaq. Reuters-in əldə etdiyi daxili memoranduma görə, Donald Trump İcra Hakimiyyətinə daxil olan federal qurumların əməkdaşlarına TikTok-u xidməti cihazlarına yükləməyə icazə verib. Bununla belə, son qərar hər bir dövlət qurumunun daxili qaydaları və informasiya təhlükəsizliyi siyasətindən asılı olacaq.