Araşdırma: TikTok-dakı gizli kodlar gənc qızları OnlyFans-a aparır

    Böyük Britaniyanın Cinsi İstismara Son Mərkəzi və Avstraliyanın “Collective Shout” təşkilatının bir ildən çox davam edən araşdırması “TikTok”un gənc qızları böyüklər üçün məzmun satılan saytlara yönləndirə bildiyini göstərib. Hesabatda “OnlyFans”ın gənclərə necə adi və cəlbedici göstərildiyi araşdırılıb. Müəlliflərə görə, bunun üçün üstüörtülü üsullardan yararlanılır. “TikTok” istifadəçiləri arasında çoxlu gənc olduğuna görə nəticələr ciddi narahatlıq doğurur.

    Araşdırmaya görə, bəzi məzmun yaradıcıları “OnlyFans” hesablarına işarə edən kodları adi həyat tərzi videolarında gizlədirlər. Belə işarələr alış-veriş, geyim, yemək bişirmə və ev heyvanları haqqında videolarda görünür. Bəzi hesablarda porno sözünün əvəzinə ingiliscə qarğıdalı mənasını verən “corn” sözü yazılır, qarğıdalı və ulduz işarələri işlədilir. İstifadəçi adları, jestlər və profildəki keçidlər izləyiciləri “OnlyFans” və “Fansly” kimi platformalara aparır.

    Hesabatda bahalı avtomobillərin, böyük evlərin, şəxsi təyyarələrin və pulun göstərildiyi videolara da diqqət çəkilib. Belə həyat tərzi “OnlyFans”dan əldə olunan gəlirin nəticəsi kimi göstərilir. Bu da gənc qadınları platformaya qoşulmağa həvəsləndirə bilər. İyulda aparılan başqa bir araşdırma vasitəçilərin sosial şəbəkələrdə yetkinlik yaşına çatmayan qızlarla əlaqə qurduğunu üzə çıxarmışdı. Onlara 18 yaşdan sonra şöhrət və yüksək qazanc vəd edilirdi.

    Araşdırma zamanı “TikTok”da Mayamidə işləyən “Bop House” üçün seçim videoları da tapılıb. Bu evdə çalışan qadınlar böyüklər üçün hazırladıqları məzmunu “OnlyFans”da satırlar. Namizədlər seçimə qatılmaq üçün cinsi məna daşıyan rəqs videoları paylaşır və “Bop House” işarələrindən yararlanırlar. Hesablarda “OnlyFans”ın adı açıq yazılmasa da, profil məlumatları izləyiciləri həmin platformaya yönəldə bilir.

    “TikTok” cinsi məzmunun paylaşılmasını və göstərilməsini qəti qadağan etdiyini açıqlayıb. Şirkət qaydaları tətbiq etmək üçün məzmunu avtomatik yoxlayan sistemlərdən yararlandığını deyir. Bu sistemlər yeniyetmələrin yaşlarına uyğun olmayan materialları görməsinin qarşısını almaq üçündür. Bununla yanaşı, platforma gənclərin bədən görünüşünə, özünə inamına və psixi sağlamlığına zərər verən məzmun göstərən alqoritmlə bağlı araşdırmalar və məhkəmə iddiaları ilə üzləşir.