Avropa Komissiyası Meta-nı 12 milyard dollarlıq cərimə ilə hədələdi

    Avropa Komissiyası Meta-nın Instagram və Facebook platformalarının dizaynı ilə bağlı apardığı ilkin araşdırmanın nəticələrini açıqlayıb. Araşdırmaya əsasən, şirkət Avropa İttifaqının Rəqəmsal Xidmətlər Aktının (DSA) tələblərini poza bilər və bunun nəticəsində həm platformaların dizaynını dəyişdirməyə məcbur qala, həm də 12 milyard dollara qədər cərimə ödəyə bilər.

    Komissiyanın bildirdiyinə görə, Meta istifadəçilərin, xüsusilə də azyaşlıların və həssas qrupların fiziki və psixoloji sağlamlığı üçün yarada biləcəyi riskləri kifayət qədər qiymətləndirməyib. Hesabatda qeyd olunur ki, fərdiləşdirilmiş tövsiyələr, avtomatik video oynatma (autoplay) və sonsuz lent (infinite scroll) kimi funksiyalar istifadəçiləri platformada daha uzun müddət saxlamağa xidmət edir və onların fasiləsiz şəkildə məzmun izləməsinə səbəb olur.

    Tənzimləyici qurum Meta-nın istifadəçilərin ekran qarşısında keçirdiyi vaxtı məhdudlaşdırmaq üçün təqdim etdiyi alətləri də yetərsiz hesab edir. Bildirilir ki, ekran vaxtını idarəetmə funksiyalarını asanlıqla keçmək mümkündür, valideyn nəzarəti alətlərindən effektiv istifadə isə kifayət qədər mürəkkəbdir. Bundan əlavə, şirkətin psixi sağlamlıqla bağlı tədbirlərinin də riskləri azaltmaq üçün kifayət etmədiyi vurğulanır.

    Avropa Komissiyası hesab edir ki, Meta Instagram və Facebook-un bəzi əsas funksiyalarını yenidən işləməlidir. Tövsiyələr arasında autoplay və infinite scroll funksiyalarının standart olaraq deaktiv edilməsi, istifadəçilərə məcburi ekran fasilələrinin təqdim olunması və tövsiyə alqoritmlərinin istifadəçi diqqətini maksimum cəlb etməyə deyil, daha balanslı istifadəyə yönəldilməsi yer alır.