Bluesky “Find Friends” funksiyasını işə saldı

    Technote.az “The Verge” platformasına istinadən bildirir ki, Bluesky istifadəçilərə artıq telefon kontaktları vasitəsilə tanışlarını tapmaq imkanı yaradır. Digər platformalarda uzun müddətdir mövcud olan bu funksiya Bluesky-də indiyədək yox idi. Şirkət bildirir ki, yeni “Find Friends” funksiyası məxfilik prinsipləri əsas götürülərək hazırlanıb və istifadəçi məlumatlarını riskə atmır.

    Bluesky-nin açıqlamasına görə, bu funksiya yalnız qarşılıqlı razılıq əsasında işləyir. Əgər istifadəçi bu funksiyadan istifadə etmirsə, onu bu üsulla tapmaq mümkün deyil. Platforma həmçinin bildirir ki, proses başlamazdan əvvəl istifadəçi telefon nömrəsinin ona məxsus olduğunu təsdiqləməlidir. Bu isə üçüncü şəxslərin təsadüfi nömrələr yükləyərək Bluesky-də kimin olduğunu öyrənməsinin qarşısını alır. İstifadəçilər istədikləri vaxt yüklədikləri kontaktları silə və funksiyadan tamamilə imtina edə bilərlər. Bu funksiya hazırda yalnız mobil tətbiqdə və məhdud sayda ölkədə aktivdir. Bu ölkələrə Avstraliya, Braziliya, Kanada, Fransa, Almaniya, İtaliya, Yaponiya, Hollandiya, Cənubi Koreya, İspaniya, İsveç, Böyük Britaniya və ABŞ daxildir.

    Bluesky əlavə edir ki, funksiyanı yeni aktiv edən istifadəçilər əvvəlcə heç bir uyğunluq görməyə bilər. Lakin zamanla daha çox insan bu funksiyaya qoşulduqca əlaqələr də görünməyə başlayacaq.