eBay və Vinted satış saytları Britaniyada 16 yaşadək uşaqlara bağlana bilər

    Böyük Britaniya 16 yaşdan kiçiklər üçün planlaşdırdığı sosial media qadağasına “eBay” və “Vinted” kimi ikinci əl məhsul platformalarını da daxil edə bilər. Mədəniyyət naziri Lisa Nandy hökumətin bu variantı ciddi şəkildə nəzərdən keçirdiyini təsdiqləyib. Əsas narahatlıq alış-verişlə deyil, uşaqların mesaj bölməsində tanımadıqları şəxslərlə əlaqə saxlaması ilə bağlıdır.

    Hökumət sosial media qadağasını 2026-cı ilin iyununda elan edib. Əsas hədəflər “Instagram”, “TikTok”, “Snapchat” və “Facebook”dur. Canlı yayım və yad şəxslərlə ünsiyyət kimi riskli funksiyaların başqa onlayn xidmətlərdə də məhdudlaşdırılması planlaşdırılır. “Depop” və “Facebook Marketplace” də bu qaydalara daxil ola bilər, amma yekun siyahı hələ açıqlanmayıb.

    “eBay” istifadəçilərdən ən azı 18 yaş tələb edir. Səbəb platformada alış və satışın hüquqi öhdəlik yaratmasıdır. “Vinted” də əsasən yetkinlər üçündür, ancaq valideynlər nəzarət etdikləri azyaşlı üçün hesab aça bilərlər. Hökumət istəyir ki, yaş tələbləri yalnız kağız üzərində qalmasın və platformalar istifadəçilərin yaşını həqiqətən yoxlasın.

    Böyük Britaniyanın rabitə tənzimləyicisi “Ofcom” yaş yoxlaması üçün 4 üsul açıqlayıb. Bunlar fotoşəkilli şəxsiyyət sənədi, rəqəmsal kimlik və bank məlumatlarının yoxlanmasıdır. Digər üsul isə şəxsin üz görünüşünə əsasən yaşını təxmin etməkdir. Ümumi sosial media məhdudiyyətlərinin 2027-ci ilin yazında qüvvəyə minməsi gözlənilir. Ətraflı qaydalar 2026-cı ilin sonunadək hazırlanmalıdır.