Fransada 15 yaşdan kiçiklər üçün sosial şəbəkə qadağası təsdiqləndi

    Fransa parlamenti 15 yaşdan kiçik uşaqların sosial şəbəkələrdən istifadəsini qadağan edən qanun layihəsini yekun parlament səsverməsində təsdiqləyib. Milli Assambleyanın qəbul etdiyi kompromis mətn qanunun qüvvəyə minməsi üçün son prosedurlar istisna olmaqla bütün parlament mərhələlərini başa vurub. Yeni qanuna əsasən, 2026-cı il sentyabrın 1-dən etibarən 15 yaşdan kiçik istifadəçilər sosial şəbəkələrdə yeni hesab yarada bilməyəcəklər. Hazırda bu platformalarda hesabı olan azyaşlılar üçün isə təxminən 4 aylıq keçid dövrü nəzərdə tutulur.

    Qanun əvvəlki variantdan fərqli olaraq yalnız müəyyən platformaların "qara siyahısı"nı deyil, 15 yaşdan kiçiklər üçün sosial şəbəkələrə ümumi qadağanı nəzərdə tutur. Qanunun əhatə etdiyi platformalar arasında Facebook, TikTok, Snapchat və YouTube kimi xidmətlərin yer alacağı gözlənilir. Bununla yanaşı, Fransada artıq ibtidai və orta məktəblərdə tətbiq olunan mobil telefon qadağası liseylərə də şamil ediləcək. Qanunun icrası üçün sosial şəbəkələr istifadəçilərin yaşını təsdiqləyən xüsusi sistemlər tətbiq etməlidirlər. Lakin bunun texniki baxımdan necə həyata keçiriləcəyi hələ dəqiq müəyyənləşdirilməyib və yaşın təhlükəsiz, eyni zamanda məxfiliyi qoruyan üsulla yoxlanılması əsas problemlərdən biri olaraq qalır.