Hindistan Meta-ya ultimatum verdi

    Hindistan hökuməti Instagram platformasında uşaqların cinsi istismarını təşviq edən reklam və məzmunların dərhal silinməsi barədə göstəriş verib. Ölkənin Elektronika və İnformasiya Texnologiyaları Nazirliyi şirkətə yeddi gün müddətində bu reklamların necə təsdiqləndiyini izah etməyi və gələcəkdə belə halların qarşısını almaq üçün hansı tədbirlərin görüləcəyini açıqlamağı tapşırıb.

    Qərar BBC Eye tərəfindən aparılan araşdırmadan sonra verilib. Araşdırmaya görə, Hindistanda yaradılmış test hesabına açıq-aşkar axtarış ifadələri ilə əlaqəli təxminən 30 müxtəlif ödənişli reklam göstərilib. Bu reklamlar istifadəçiləri uşaqların cinsi istismar materiallarının satıldığı iddia edilən Telegram kanallarına yönləndirib. Hindistan hökuməti yalnız reklamların silinməsini deyil, həm də bu tip məzmunların platformanın alqoritmləri vasitəsilə daha geniş auditoriyaya çatdırılmasına qarşı tədbirlərin görülməsini tələb edir.