Hollivudun diqqət mərkəzində olan Letterboxd satıla bilər

    Technote.az “TechCrunch” platformasına istinadən bildirir ki, film həvəskarları üçün sosial platforma kimi tanınan Letterboxd-un yaxın vaxtlarda satıla biləcəyi bildirilir. Son illərdə sürətlə populyarlaşan platformanın əsas investoru çıxış strategiyası axtarır. Məlumata görə, Kanadaya məxsus holding şirkəti Tiny, hansı ki platformanın təxminən 60 faizinə sahibdir, artıq potensial alıcılarla danışıqlara başlayıb. Bu alıcılar arasında media şirkəti Versant və Hollivud yönümlü məşhur xəbər bülleteni The Ankler də yer alır.

    Letterboxd istifadəçilərə filmləri qiymətləndirmək, rəy yazmaq və tövsiyələr paylaşmaq imkanı yaradır. Platforma xüsusilə son illərdə millennial və Gen Z auditoriyası arasında ciddi populyarlıq qazanıb. Statistikaya əsasən, istifadəçi sayı 2020-ci ildəki 1,7 milyondan 2026-cı ildə təxminən 26 milyona qədər yüksəlib. Şirkət 2023-cü ildə Tiny tərəfindən 50 milyon dollardan artıq dəyərləndirmə ilə alınmışdı. Hazırda isə mümkün satışın hansı qiymətə baş tutacağı və razılaşmanın nə qədər irəlilədiyi məlum deyil.

    Platformanın yüksəlişi film studiyalarının da diqqətini cəlb edib. Onlar Letterboxd-u həm filmlərin marketinqi, həm də tamaşaçı zövqlərini analiz etmək üçün mühüm mənbə kimi görürlər. Hətta platforma bir neçə il əvvəl Academy of Motion Picture Arts and Sciences ilə rəqəmsal kontent əməkdaşlığı da qurub.