İlin fırıldağı. Vlogger ödənişli əsl UFC döyüşünü kompüter oyunu kimi izləyicilərə təqdim etdi

Belə ki, AJ Lester ləqəbli gənc vlogger sistemi aldadaraq öz kanalında Jose Aldo ilə Max Holloway-ın UFC 2018 turniri çərçivəsində vacib döyüşün canlı yayımını təqdim edib. Bu barədə Eurogamer.net saytı xəbər verib. Bu cür döyüşlər adətən ödənişli yayımlar vasitəsilə izləyicilərə təqdim olunur. YouTube və Twitch kimi servislərdə həmin döyüşlərin yayımı isə ban olunur. Lakin AJ Lester adlı gənc vlogger sistemi necə aldadacağının yolunu tapıb. Sistem tərəfindən ban almamaq üçün vlogger bütün döyüş vaxtı özünü elə aparıb ki, guya “EA” şirkətinin UFC 3 oyununu oynayır.

Canlı yayım zamanı AJ Lester guya gamepad düymələrinə basaraq nəsə etdiyini və hətta ekranda döyüşçülərdən birində (guya onun idarə etdiyi oyunçu) nəsə alınmayanda şikayətlənərək bacardığı qədər özünü elə göstərib ki, guya ekranda əks olunan real döyüş yox sadəcə olaraq bir kompüter oyunudur. Bütün gecə ərzində o, obrazdan çıxmayaraq qalibiyyətə sevinir və nəsə düzgün getməyəndə üzülürdü. Maraqlısı bundadır ki, vloggerin bu hiyləsi tamamilə baş tutub. Onun canlı yayımı blocklanmadı və bir dəfə də olsun yoxlanışdan keçmək üçün kəsilmədi. AJ Lester-in bu hərəkəti oyun sektorunda əsl rezonans yaratdı. Bir neçə saat ərzində onun kanalına minlərlə insan abunə oldu.