Instagram-da yenilik. Bundan sonra Stories-ə istədiyiniz foto və videonu yükləyə biləcəksiniz

Bu yenilik olmamışdan öncə Instagram -ın Stories bölməsinə yalnız son 24 saat ərzində çəkilmiş foto və videonu yükləmək mümkün idi. Bu zaman tətbiq foto və videonun metaməlumatlarını yoxlayırdı. Buna görə də Instagram istifadəçiləri bir sıra hiylələrə əl atırdılar. Məsələn, onlar hansısa fotonun screenshotunu çəkir və ya köhnə videonun çəkiliş tarixini dəyişirdilər. İndi isə bunu etməyə ehtiyac qalmayıb.

Belə ki, Stories bölməsinə istənilən foto və videonu yükləmək olar. Lakin köhnə materialların yüklənməsi zamanı tətbiq həmin materialların hansı tarixdə çəkildiklərini əks etdirəcək stikerin əlavə olunmasını təklif edəcək. Bu üsulla Instagram yaradıcıları insanların öz abunəçiləri ilə səmimi olmalarına imkan yaradır. Bu yenilik həmçinin əsas səhifəyə foto paylaşıb daha sonra onu pozanlara da yönəlib.