Instagram-ın yeni loqosu internetdə müzakirələrə səbəb oldu

    Instagram brend kimliyini yeniləyərək tətbiqin yuxarı hissəsində görünən məşhur əlyazma üslublu yazı loqosunu dəyişib. Ancaq smartfonlarda gördüyümüz rəngli kamera ikonu olduğu kimi qalacaq. Instagram rəhbəri Adam Mosserinin sözlərinə görə, tətbiqin yuxarı hissəsindəki “Instagram” yazısı son 10 ildə dəyişdirilməmişdi və şirkət artıq onu yeniləməyin vaxtının çatdığını düşünüb. Yeni versiya əvvəlki dizaynın əsas xüsusiyyətlərini qorusa da, daha sadə, qalın və müasir görünüşə malikdir. Instagram bildirir ki, dizayn komandası yeni loqonu hazırlayarkən yüzlərlə variantı sınaqdan keçirib. Bunların arasında böyük hərflərlə yazılmış loqolar, kamera elementlərindən istifadə edən dizaynlar və həqiqi əl yazısını xatırladan variantlar da olub. Nəticədə şirkət yenidən əlyazma üslubunda qalmağa qərar verib.

    Instagram-ın məhsul dizaynı direktoru Jasmine Probst bunu əlyazma üslubunun fərdiliyi daha yaxşı ifadə etməsi ilə izah edib. Şirkətin fikrincə, yeni loqo daha sadə olsa da, Instagram-ın əsas ideyalarından biri olan şəxsi ifadə və fərdi üslubu qoruyur. Dəyişiklik yalnız loqo ilə məhdudlaşmır. Instagram ümumilikdə brend kimliyini yeniləyir. Instagram Sans şrifti təkmilləşdirilib, həmçinin Instagram Pen və Instagram Mono adlı iki yeni şrift hazırlanıb. Gələcəkdə tətbiqin animasiyalarında, səhifə tərtibatında və digər vizual elementlərində də dəyişikliklər görünəcək. Instagram məşhur rəng keçidindən, gradientdən də əvvəlkindən daha az istifadə etməyi planlaşdırır.

    Yeni yazı loqosu artıq qlobal şəkildə istifadəçilərə təqdim edilməyə başlayıb. Brend yenilənməsinin digər hissələri isə 2026-cı il ərzində və sonrakı dövrdə mərhələli şəkildə istifadəyə veriləcək. Yeni dizayn sosial şəbəkələrdə müxtəlif reaksiyalarla qarşılanıb. Bəzi istifadəçilər daha sadə görünüşü bəyənsələr də, digərləri əvvəlki loqonun daha xarakterik olduğunu düşünür.