Meta yeniyetmələr üçün Facebook və Instagram-a 2 saatlıq limit qoyur

    Meta yeniyetmələrin Facebook və Instagram istifadəsini məhdudlaşdıran yeni təhlükəsizlik qaydaları tətbiq etməyə hazırlaşır. Lakin şirkətin açıqladığı yeni tədbirlər hələlik yalnız ABŞ-dəki istifadəçilərə şamil olunacaq. Yeni qaydalar Meta-nın uşaqların məxfiliyi və sosial media asılılığı ilə bağlı ABŞ-nin onlarla ştatı tərəfindən qaldırılmış məhkəmə iddiaları üzrə əldə etdiyi razılaşmanın bir hissəsidir. Razılaşmaya əsasən, şirkət ştatlara ümumilikdə 18 milyard dollara qədər ödəniş edə bilər.

    Yeni sistem 13-17 yaş arası istifadəçilərin Facebook və Instagram-da keçirdiyi vaxta bir sıra məhdudiyyətlər gətirəcək. Əsas dəyişikliklərdən biri yeniyetmələr üçün gündəlik standart istifadə müddətinin 2 saat müəyyənləşdirilməsidir. Bundan əlavə, gecə saatlarında tətbiqlərə giriş avtomatik olaraq məhdudlaşdırılacaq. Valideynlər isə bu limitləri daha da sərtləşdirə biləcəklər. Yeniyetmələrə həmçinin alqoritmik tövsiyələr əsasında formalaşmayan lentə keçmək imkanları olduğu xatırladılacaq. Valideyn və ya qəyyumlar bu variantı yeniyetmənin hesabında standart seçim kimi təyin edə biləcəklər.

    Meta sözçüsünün bildirdiyinə görə, şirkət ABŞ-də tətbiq ediləcək dəyişikliklərin nəticələrini izləyəcək və digər ölkələrin hökumətləri ilə də bu məsələ ətrafında danışıqları davam etdirəcək. Lakin hazırda qaydaların ABŞ-dən kənarda tətbiqi ilə bağlı konkret qərar yoxdur. Böyük Britaniya hökuməti isə Meta-dan eyni təhlükəsizlik tədbirlərini ölkədəki yeniyetmələr üçün də tətbiq etməsini gözləyir. Böyük Britaniyanın əmək və pensiyalar naziri Pat MakFadden bildirib ki, amerikalı yeniyetmələrin britaniyalı yeniyetmələrdən daha yüksək səviyyədə qorunduğu vəziyyətin yaranmasını istəmirlər. Meta eyni zamanda bildirib ki, TikTok və YouTube da oxşar addımlar atarsa, Facebook və Instagram üçün nəzərdə tutulan vaxt məhdudiyyətlərini daha da sərtləşdirə bilər. Hazırkı razılaşmaya əsasən, bəzi məhdudiyyətlərin ən azı beş il qüvvədə saxlanılması nəzərdə tutulur.