Rusiya Dövlət Dumasının üzvü Oleg Matveychev WhatsApp-ın terrorçu və radikal qruplar tərəfindən istifadə edildiyini iddia edib. Matveychev platformanın Rusiya təhlükəsizlik qurumları ilə əməkdaşlıq etməkdən imtina etdiyini vurğulayaraq belə deyib: "Rusiya hakimiyyət orqanları WhatsApp-ın əməkdaşlığa açıq olub-olmadığını görəcək. Top indi onların meydançasındadır".

     Dekabrın 19-da Rusiyanın media tənzimləyicisi Roskomnadzor, WhatsApp və Skype-ı istifadəçi məlumatlarını Rusiyada saxlamağı və təhlükəsizlik qurumlarına təqdim etməyi məcburi edən bir reyestrə daxil edib. Lakin WhatsApp rəhbərliyi hələlik bu qaydalara əməl etmək üçün addım atmayıb. Rusiya bundan əvvəl terrorla mübarizə qanunlarını pozduğu səbəbiylə populyar mesajlaşma tətbiqi Viber-i də bloklamışdı. Facebook, Instagram və keçmiş adı ilə Twitter (indiki X) kimi sosial media platformalarına isə Ukraynanın işğalının ilk günlərindən etibarən Rusiyada VPN olmadan giriş mümkün deyil.

     Rusiya hökumətinin populyar mesajlaşma tətbiqlərində beynəlxalq zəngləri tamamilə qadağan etmək və ya xarici istifadəçilərin zənglərini məhdudlaşdırmaq kimi yeni addımlar atmağı planlaşdırdığı barədə də məlumatlar dolaşır. Kommersant qəzetinə görə, bu qərar fırıldaq məqsədli zənglərin artması səbəbindən gündəmə gəlib və bu zənglərin təxminən 70%-nin xaricdən edildiyi qeyd olunub.