TikTok-un ABŞ bölməsi ortaq uşaq təhlükəsizliyi proqramına qoşuldu

    “TikTok”un ABŞ bölməsi uşaqların təhlükəsizliyi üçün yaradılan platformalararası “Lantern” proqramına qoşulub. “TikTok USDS Joint Venture” adlı qurum sosial şəbəkədən ayrıldıqdan 8 ay sonra bu addımı atıb. 2023-cü ildə başlayan proqramda texnologiya şirkətləri təhlükəli davranış və məzmunla bağlı xəbərdarlıqları təhlükəsiz şəkildə paylaşır. Məqsəd bir platformadan digərinə keçən zərərli şəxsləri daha tez tapmaqdır.

    “Lantern” proqramına “Google”, “X”, “Snap”, “Twitch”, “Anthropic”, “Meta”, “Discord”, “Microsoft”, “Apple”, “Roblox” və “Reddit” də qoşulub. İştirakçılar 2025-ci ilin sonunadək potensial qayda pozuntuları barədə 2 milyondan çox siqnal paylaşıb. Bununla şübhəli hesabları və şəxsləri başqa platformaya keçdikdə aşkarlamaq asanlaşır. Proqram rəhbərliyinin fikrincə, “TikTok”un iştirakı şirkətlər arasındakı əməkdaşlığı gücləndirəcək.

    ABŞ qanunlarına görə, ölkədə işləyən şirkətlər uşaqların cinsi istismarını göstərən materialları və digər təhlükələri aşkarladıqda NCMEC-in “CyberTipline” xidmətinə xəbər verməlidir. “TikTok”un ABŞ birgə müəssisəsi də indiyədək bu tələbə əməl edib. Şirkət sistemin yenilənməsinə 2 milyon dollar (təxminən 3,4 milyon manat) ayıracağını açıqlayıb. Pul daha güclü axtarış, avtomatik yoxlama və məlumatların təhlili üçün yeni alətlərə xərclənəcək.

    “CyberTipline” sisteminin yenilənməsi layihəsinin 3 il davam edəcəyi gözlənilir. Layihənin ümumi dəyəri 10 milyon dollar (təxminən 17 milyon manat) hesablanır. “AWS”, “Microsoft” və “Palantir” də texniki resurslarla layihəyə dəstək verəcək. Yeni alətlər təhlükəli materialları daha tez tapmalı və əl ilə görülən işə sərf olunan vaxtı 2 dəfə azaltmalıdır. Hüquq-mühafizə orqanlarına məlumatların göndərilməsi də sürətlənməlidir.