WhatsApp istifadəçilərinə yeni funksiyalar təqdim etdi

    WhatsApp istifadəçilər üçün bir sıra yeni funksiyaları istifadəyə verib. Yeniliklər arasında Apple CarPlay və Android Auto dəstəyinin genişləndirilməsi, iPad üzərindən birbaşa hesab yaratmaq, musiqi paylaşımı və PDF sənədləri ilə işləmək imkanları yer alır.

    Şirkət bildirir ki, məqsəd WhatsApp-ı təkcə mobil mesajlaşma tətbiqi deyil, müxtəlif cihazlarda rahat istifadə olunan tam funksional ünsiyyət platformasına çevirməkdir. Ən diqqətçəkən yeniliklərdən biri avtomobil sistemləri ilə inteqrasiyanın genişləndirilməsidir. İndiyədək CarPlay vasitəsilə yalnız mesaj göndərmək və zəng etmək mümkün idisə, artıq istifadəçilər daxil olan mesajları dinləyə, onlara səsli cavab verə, zəng tarixçəsini görə və sevimli kontaktlarına daha sürətli çıxış əldə edə biləcəklər. Eyni imkanlar Android Auto istifadəçiləri üçün də təqdim olunur.

    WhatsApp həmçinin iPad tətbiqində mühüm dəyişiklik edib. İndiyədək iPad-də tətbiqdən istifadə etmək üçün onu telefondakı hesabla əlaqələndirmək tələb olunurdu. Artıq isə istifadəçilər telefon nömrəsi və SMS təsdiq kodu vasitəsilə birbaşa iPad üzərindən yeni WhatsApp hesabı yarada biləcəklər. Bu hesab müstəqil işləyəcək və əsas telefon cihazına bağlı olmayacaq. Bundan əlavə, istifadəçilər artıq Apple Music və Spotify üzərindən dinlədikləri mahnıları birbaşa WhatsApp Status bölməsində paylaşa biləcəklər. Şirkətin sözlərinə görə, bu funksiya istifadəçilərə statuslarını daha fərdi və yaradıcı şəkildə paylaşmağa imkan verəcək.