Adobe: Ali rəhbərlərin 99%-i, işçilərin isə 41%-i süni intellekt işlədir

    “Adobe Acrobat”ın Böyük Britaniyada apardığı araşdırma iş yerlərində süni intellektdən istifadənin vəzifəyə görə ciddi şəkildə dəyişdiyini göstərib. Ali rəhbərlərin 99%-i süni intellekt alətlərindən istifadə edir, rəhbər vəzifədə olmayan əməkdaşlarda bu göstərici 41%-dir. Fərq həm istifadə səviyyəsində, həm də bu alətlərin hansı işlər üçün seçilməsində görünür.

    Adi əməkdaşların 17%-i süni intellektdən əsasən sənədlərin hazırlanması və redaktəsi üçün yararlanır. Rəhbərlər arasında ən geniş yayılmış sahə məlumatların təhlilidir və göstərici 35%-dir. Onların 33%-i bu alətlərdən görüş və tapşırıqların idarəsində, 25%-i marketinq işlərində istifadə edir.

    Bu fərq qənaət olunan vaxtda da görünür. Ali rəhbərlərin 37%-i süni intellekt sayəsində həftədə 3-5 saat qazandığını deyib. Adi əməkdaşlarda bu pay cəmi 13%-dir. Araşdırmaya görə, nəticəyə alətlərə çıxış, istifadə bacarığı və şirkət daxilində verilən dəstəyin vəzifədən asılı olaraq dəyişməsi təsir edir.

    Sənədlərin süni intellekt alətləri ilə paylaşılmasına münasibət də fərqlidir. Ali rəhbərlərin 74%-i sənədləri bu alətlərlə paylaşmağa hazırdır, digər əməkdaşlarda göstərici yalnız 20%-dir. Məlumat təhlükəsizliyi və məxfiliklə bağlı narahatlıqlar 22% göstərici ilə süni intellektin iş yerlərində yayılmasına mane olan əsas problemlərdən biri olaraq qalır.

    Araşdırmada şirkətlərə əvvəlcə əməkdaşların gündəlik inzibati yükünü azaldan sadə proqramlardan başlamaq məsləhət görülür. Görüşlər, elektron məktublar və birgə iş materialları üçün ilkin mətnlərin və xülasələrin hazırlanması buna nümunədir. Şirkətlər bunun üçün təhlükəsizlik, məxfilik və şəffaflıq qaydalarını aydın izah etməli, bütün əməkdaşlara süni intellektdən istifadə ilə bağlı dəstək verməlidir.