YouTube yaradıcılar üçün yeni süni intellekt alətləri təqdim etdi

    “YouTube” illik “Made on YouTube” tədbirində yaradıcılar üçün süni intellektlə işləyən yeni alətlərini göstərib. Yeniliklər videoya rəy verməkdən kanal göstəricilərini təhlil etməyə qədər bir çox işi əhatə edir. Platforma fərqli başlıqları, üzlük şəkillərini və video versiyalarını sınaqdan keçirəcək. Məqsəd hansı variantın daha çox baxış vaxtı topladığını müəyyənləşdirməkdir. Alətlər “YouTube Studio”ya əlavə olunur.

    Əsas yeniliklərdən biri arxa planda işləyən süni intellekt agentidir. Bu, verilən tapşırıqları özü yerinə yetirən avtomatik köməkçidir. Agent köhnə videoları yoxlayaraq yenidən populyarlaşan və ya gündəmə görə aktuallıq qazanan məzmunu tapacaq. Sonra başlığı və üzlük şəklini dəyişməyi məsləhət görəcək. O, auditoriya məlumatlarına əsasən sponsorlar üçün təqdimat da hazırlayacaq.

    “Ask Studio” yayımlanmamış videolara baxaraq onların tempi, quruluşu və hekayəsi ilə bağlı fərdi məsləhətlər verəcək. Alət əvvəlki videoları və istifadəçi şərhlərini nəzərə alıb alternativ başlıqlar və üzlük şəkilləri hazırlayacaq. Kanal göstəricilərindəki dəyişikliklərin səbəbini də sadə dildə izah edəcək. Xidmət “iOS” və “Android” tətbiqlərində açılacaq. Araşdırma lenti isə platformada maraq görən mövzuları göstərəcək.

    Dinamik üzlük funksiyası hər video üçün 3 şəkli fərqli auditoriya qruplarında sınayacaq. Yaradıcılar giriş hissəsi və quruluşu fərqlənən 3 video versiyasını da müqayisə edə biləcəklər. Qalib variantı yaradıcı özü saxlaya bilər. Seçim edilməsə, sistem onu 7 gündən sonra avtomatik seçəcək. “YouTube” başlıq və üzlüklər üçün artıq 40 milyondan çox sınaq aparıb. Platforma 2027-ci ildən 3 fərqli “Shorts” versiyasını yoxlamağa şərait yaradacaq.

    Alış-veriş videolarında süni intellekt məhsulları avtomatik işarələyəcək. Bu yolla yaradıcılar tərəfdaşlıq proqramlarından gəlir qazana biləcəklər. “Amazon” tərəfdaşlıq proqramı ABŞ-dən kənarda da genişlənəcək. Növbəti ilin əvvəlində canlı yayımların başqa dillərə real vaxtda avtomatik dublyajı sınaqdan keçiriləcək. “Live showdown” ilə yaradıcılar ortaq yayım aça və başqa yayımçılarla uyğunlaşdırıla biləcəklər. “Shorts” üçün səslə montaj funksiyası və “YouTube Create” daxilində əlavə alətlər də açıqlanıb.

    “YouTube” videolarına televizordan baxanların sayı artmağa davam edir. Ən böyük 100 yaradıcıdan yarıdan çoxunun videoları ən çox televizorda izlənir. Qısa, şaquli və hissələrə bölünmüş mikrodramlar 2026-cı ilin ilk yarısında 6,5 milyard baxışı keçib. Bu videoların ümumi izlənmə müddəti illik 50% artıb. Mikrodramların televizorlardakı baxış sayı da əvvəlki illə müqayisədə 90% yüksəlib.

    Süni intellektdən yararlanan yaradıcılar səhvlərin onlara olan etimadı azalda biləcəyindən narahatdırlar. “YouTube” işləri sürətləndirən alətlərlə məzmunu başdan sona hazırlayan sistemlər arasında fərq olduğunu düşünür. Şirkətə görə, ssenarinin yazılmasını, çəkilişi və bütün videonun hazırlanmasını süni intellektə həvalə etmək problemli istifadəyə daxildir. “YouTube” yeni alətlərin baxış göstəricilərini yaxşılaşdırdığını sübut edən rəqəmlər açıqlamayıb. Platforma yalnız bu yeniliklərin vaxta qənaət etdiyini deyib.