Amazon Alexa alış köməkçisi üçün 100-dən çox yeni funksiya təqdim etdi

    “Amazon” bayram mövsümü ərəfəsində “Alexa for Shopping” köməkçisinə onlayn alış-veriş üçün 100-dən çox yeni funksiya əlavə edib. İstifadəçilər sadə sorğularla siyahıları, abunələri və çatdırılma göstərişlərini idarə edə bilirlər. Köməkçi ödəniş və geri qaytarılma ilə bağlı sualları da cavablandırır. Bütün yeniliklər ABŞ-də artıq istifadəyə verilib.

    “Alexa” alış və hədiyyə siyahıları yarada, siyahıya məhsul əlavə edə və orada nələrin olduğunu göstərə bilir. Məhsulları bir siyahıdan digərinə keçirmək və məlumatları dəyişmək də olur. İstifadəçi köməkçidən toy üçün hədiyyə siyahısında hansı məhsulların qaldığını soruşa bilər. Beləliklə, ailə və dostlar üçün hədiyyə seçmək daha rahat olur.

    Yeniliklər təkrar məhsul sifarişlərini də əhatə edir. “Subscribe & Save” istifadəçiləri növbəti çatdırılmanı ötürə, abunəni dayandıra və məhsulun hər ay deyil, 3 aydan bir göndərilməsini istəyə bilərlər. “Alexa” istifadəçinin il ərzində “Prime” sayəsində nə qədər qənaət etdiyini də göstərir. Köməkçidən “Audible” abunəliyinin nə vaxt yenilənəcəyini soruşmaq olur.

    İstifadəçilər “Alexa” ilə çatdırılma ünvanını dəyişə, həmçinin bağlamanın harada saxlanılacağına dair əlavə göstəriş yaza bilirlər. Köməkçi hədiyyə kartındakı balansı və geri ödənişin hansı mərhələdə olduğunu da göstərir. Tanış olmayan ödəniş barədə məlumat almaq və ödəniş problemi ilə bağlı kömək istəmək olur. “Prime” və “Audible” abunəlikləri haqqında ümumi suallar da cavablandırılır.

    Yenilənmiş köməkçini “Amazon Shopping” tətbiqindəki “Alexa” işarəsindən və şirkətin kompüterlər üçün saytından açmaq olur. Xidmət tətbiqdə və saytda axtarış bölməsinin yanındadır. Köməkçi əvvəllər də məhsul tapır, qiymətləri müqayisə edir və endirimləri izləyirdi. Qiymət müəyyən həddən aşağı düşəndə avtomatik sifariş vermək də olurdu. “Amazon” yeni məhsullar və təkliflər barədə bildirişləri də genişləndirir.

    “Alexa for Shopping” köməkçisi may ayında rəsmi istifadəyə verilib. Bununla yanaşı, “Amazon” “Meta” və “Perplexity” kimi şirkətlərin kənar süni intellekt (AI) əsaslı alış köməkçilərinə məhdudiyyət qoyur. Şirkətin məlumatına görə, ilin əvvəlindən tapşırıqları özü yerinə yetirən agent funksiyalarından istifadə edənlərin sayı 8 dəfə artıb. Son 12 ayda 400 milyondan çox istehlakçı alış-veriş üçün “Alexa”dan yararlanıb.