Britaniya Kolumbiyası silahlı hücuma görə OpenAI-ni məhkəməyə verdi

    Kanadanın Britaniya Kolumbiyası əyaləti Tumbler Ridge-dəki silahlı hücumla bağlı “OpenAI”-ni məhkəməyə verib. İddiaya görə, şirkət təhlükəsiz olmayan məhsul hazırlayıb və hücumçunun çatbotla söhbətləri barədə polisə xəbər verməyərək səhlənkarlıq edib. Əyalət hesab edir ki, “OpenAI” insan nəzarətçilərinin polisə məlumat vermək tövsiyəsinə əməl etsəydi, faciənin qarşısı alına bilərdi.

    Kanada hökuməti fevralda “OpenAI”-dan təhlükəsizlik qaydalarını dəyişməyi tələb edib. Çünki şirkət əməkdaşları 2025-ci ildə hücumçunun hesabında real həyatda zorakılıq riski yaradan məzmun aşkarlayıb, amma dövlət orqanlarına xəbər verməyiblər. “OpenAI” ilk hesabı bloklayıb, daha sonra həmin şəxsin 2-ci hesab yaratdığını müəyyən edib.

    Hadisədən sonra “OpenAI” real təhlükə yaradan ciddi təhdidlər barədə səlahiyyətli orqanlara məlumat verəcəyini açıqlayıb. Şirkətin rəhbəri Sam Altman ilk hesab bloklanarkən polisə xəbər verilmədiyi üçün üzr istəyib. Britaniya Kolumbiyasının baş naziri David Eby üzrün vacib olduğunu, amma qətiyyən kifayət etmədiyini deyib. Onun sözlərinə görə, şirkət təhlükəsizlik məsələlərində Kanada ilə ciddi əməkdaşlıq qurmayıb.

    Britaniya Kolumbiyasının baş prokuroru Niki Sharma deyib ki, texnologiyanın yeni olması heç bir şirkəti məsuliyyətdən azad etməməlidir. O, bəzi süni intellekt (AI) şirkətlərinin rəhbərlərinin qabaqcıl sistemlərin inkişafının dünya üzrə yavaşladılmasını istədiklərini də xatırladıb. İddia Kanadada deyil, “OpenAI”-ın yerləşdiyi Kaliforniya ştatında qaldırılıb. Bu seçim qurbanların ailələrinin daha böyük təzminat almasına yol aça bilər.

    Britaniya Kolumbiyası “OpenAI”-dan Tumbler Ridge-də yeni məktəbin tikintisini maliyyələşdirməyi də tələb edir. Zərərçəkənlərin ailələri şirkətə qarşı ayrıca şikayət verərək eyni səhlənkarlıq ittihamını irəli sürüblər. Məhkəmənin bu tələblər və ödənə biləcək məbləğlərlə bağlı hansı qərarı verəcəyi hələ bəlli deyil.