Canva animasiya və marketinq sahəsində iki startapı satın aldı

    Technote.az “TechCrunch” platformasına istinadən bildirir ki, qrafik dizayn və yaradıcı alətlər platforması olan Canva animasiya və reklam texnologiyaları sahəsində fəaliyyət göstərən iki startapı, Cavalry və Mango AI-ı eyni vaxtda satın aldığını açıqlayıb.

    Böyük Britaniyada yerləşən Cavalry 2D motion animasiya alətləri üzərində çalışır və reklam, marketinq, oyun və generativ incəsənət kimi müxtəlif sahələr üçün həllər təqdim edir. Canva bildirib ki, Cavalry-nin texnologiyası şirkətin 2024-cü ildə əldə etdiyi və peşəkar dizaynerlər üçün nəzərdə tutulan Affinity paketinə inteqrasiya olunacaq. Canva ötən il Affinity interfeysini yeniləyərək onu bütün istifadəçilər üçün pulsuz etmişdi. Şirkətin məlumatına görə, həmin vaxtdan bəri proqram 5 milyondan çox dəfə yüklənib. Affinity hazırda foto, vektor və layout (maket) redaktəsi imkanları təqdim edir. Cavalry-nin alınması ilə Canva bu paketə motion (hərəkətli qrafika) redaktəsini də əlavə etməyi planlaşdırır.

    Şirkət rəsmi bloq paylaşımında bildirib ki, bu addım “foto, vektor, layout və artıq motion redaktəni bir araya gətirən tam funksional peşəkar Creative OS” qurmaq məqsədi daşıyır. Canva beləliklə, həm geniş kütlə, həm də peşəkar yaradıcılar üçün vahid ekosistem formalaşdırmaq istəyir. Canva-nın ikinci satınalması olan Mango AI isə video reklamların effektivliyini artırmaq üçün gücləndirilmiş öyrənmə (reinforcement learning) sistemləri hazırlayırdı. Startapın ilk məhsulu brendlərə reklam yaratmaq, yayımlamaq və nəticələri analiz edərək növbəti kampaniyaları optimallaşdırmaq imkanı verirdi.

    Mango AI-ın təsisçiləri daha əvvəl Netflix və Roblox kimi şirkətlərdə çalışıblar. Startapın həmtəsisçisi Nirmal Govind Canva-da ilk dəfə yaradılan “Chief Algorithms Officer” vəzifəsini tutacaq, digər həmtəsisçi Vinith Misra isə şirkətin marketinq məhsullarının inkişafına rəhbərlik edəcək.