Cursor-dan Hindistan üçün 7 dollarlıq AI paketi

    Süni intellekt əsaslı kodlaşdırma platforması Cursor Hindistan bazarı üçün daha ucuz abunə planını istifadəyə verib. Cursor Start adlanan yeni paket aylıq 649 rupi, yəni təxminən 7 dollara təklif olunur. Müqayisə üçün, Cursor-un standart Pro paketinin qiyməti aylıq 20 dollardır. Bu, Cursor-un ilk dəfə hər hansı ölkə üçün lokal qiymət siyasəti tətbiq etməsidir. Şirkətin Hindistanı seçməsi isə təsadüfi deyil. Ölkə hazırda Cursor-un üçüncü ən böyük bazarıdır və platformanın ən aktiv istifadəçilərinin böyük hissəsi burada yerləşir. Son bir ildə Cursor-un Hindistandakı istifadəçi sayı üç dəfə artaraq 3 milyondan çox olub.

    Yeni planın bu qədər ucuz olmasının əsas səbəbi istifadə edilən AI modelləridir. Cursor Start əsasən şirkətin özünün nəzarət etdiyi modellərə söykənir və daha bahalı OpenAI və Anthropic modellərinə çıxış təqdim etmir. Bununla Cursor üçün hər istifadəçinin yaratdığı AI xərcləri əhəmiyyətli dərəcədə azalır. Cursor-un Asiya-Sakit okean və Yaponiya üzrə rəhbəri Simon Green bildirib ki, yeni paket zərərlə satılan kampaniya deyil və mövcud qiymətlə davamlı şəkildə işləyə bilər. Şirkət Hindistanda daha münasib qiymətlə daha böyük istifadəçi bazası formalaşdırmağı hədəfləyir.