Decodo 45 AI agentini sınadı: heç biri brauzerdə tam müstəqil deyil

    “Decodo” 45 süni intellekt agentini sınaqdan keçirib. Araşdırmanın nəticələrinə görə, bu vasitələr brauzerdəki real tapşırıqları hələ tam müstəqil yerinə yetirə bilmir. Süni intellekt agenti istifadəçinin göstərişi əsasında internetdə müxtəlif addımları özü icra edən vasitədir. Agentlər formaları doldurmaq, əməliyyatları tamamlamaq və bir neçə açıq səhifədəki məlumatı birlikdə izləmək də daxil olmaqla 10 imkan üzrə yoxlanılıb. Maksimum 20 balı heç biri toplaya bilməyib.

    Sınaqda ən yüksək nəticəni 18 balla “Claude for Chrome” göstərib. “OpenAI” şirkətinin “ChatGPT Chrome Extension” məhsulu isə 14 bal toplayaraq rəqibindən geri qalıb. Bununla belə, liderin nəticəsi də mümkün maksimumdan 2 bal az olub. Araşdırma şirkətlərin və tərtibatçıların vədləri ilə məhsulların real imkanları arasında fərq olduğunu göstərib. Nəticələr kateqoriyalara görə xeyli dəyişdiyindən istifadəçilərə görəcəkləri işə uyğun vasitə seçmək tövsiyə olunur.

    Süni intellekt agentləri ən zəif nəticəni alış və ödəniş əməliyyatlarında göstərib. Bu kateqoriyada orta göstərici mümkün 2 baldan cəmi 0,43 bal olub. Agentlər çox vaxt məhsulu seçib sifarişin son mərhələsinə çatsalar da, istifadəçinin adından alışı tamamlaya bilməyiblər. Araşdırmada kredit kartı nömrəsi kimi həssas məlumatların qorunması üçün mövcud təhlükəsizlik tədbirlərinin kifayət etməyə biləcəyi də vurğulanıb.

    Təhlükəsizliklə bağlı çatışmazlıqlar bir neçə mərhələli tapşırıqlarda da üzə çıxıb. Belə işləri görə bilən agentlərin yarıdan çoxunda geri qaytarılması mümkün olmayan addımdan əvvəl işə düşən və sənədləşdirilmiş hər hansı qoruma tədbiri olmayıb. Yəni agent əməliyyatı texniki baxımdan yerinə yetirsə belə, istifadəçinin məlumatlarını lazımi səviyyədə qorumaya bilər. Buna görə araşdırmada agentlərin yalnız imkanlarının deyil, təhlükəsizlik mexanizmlərinin də yoxlanması vacib sayılır.

    Bununla yanaşı, brauzerə birbaşa qoşulan bəzi agentlər bir neçə açıq səhifədəki məlumatı birlikdə anlama bacarığı üzrə tam bal toplayıb. Bu xüsusiyyət istifadəçi səhifələr arasında keçid edərkən agentin tapşırığın məzmununu unutmamasına kömək edir. “Decodo” şirkətində məhsul marketinqi qrupunun rəhbəri Gabriele Vitke istifadəçilərə ən çox funksiyası olan vasitəni deyil, görəcəkləri işə uyğun olanı seçməyi tövsiyə edib. Araşdırmanın ümumi nəticəsinə görə, süni intellekt agentləri faydalı olsa da, brauzerdən tam müstəqil istifadə edə biləcək səviyyəyə hələ çatmayıb.