Elon Musk OpenAI və Microsoft-dan 134 milyard dollar tələb edir

    Elon Musk OpenAI və Microsoft-a qarşı açdığı məhkəmə işi çərçivəsində 79 milyard dollardan 134 milyard dollara qədər kompensasiya tələb edir. Bu barədə ilk olaraq Bloomberg məlumat yayıb. Məhkəməyə təqdim olunan son sənədlərə əsasən, Musk OpenAI-ın qeyri-kommersiya statusundan uzaqlaşaraq “qanunsuz gəlir” əldə etdiyini iddia edir və bu gəlirlərdən ona pay düşdüyünü bildirir. Musk OpenAI-ın ilkin mərhələsində 38 milyon dollar həcmində investisiya etdiyini, bu məbləğin qeyri-kommersiya təşkilatının “seed funding” mərhələsinin təxminən 60 faizini təşkil etdiyini vurğulayır.

    İddia sənədlərində qeyd olunur ki, Musk təkcə maliyyə dəstəyi göstərməyib, eyni zamanda əsas kadrların cəlb olunmasında, biznes əlaqələrinin qurulmasında və startap məsləhətlərində də aktiv rol oynayıb. Onun tərəfdən ekspert kimi çıxış edən maliyyə iqtisadçısı C. Paul Wazzan-ın hesablamalarına görə, OpenAI 65,5–109,4 milyard dollar, Microsoft isə 13,3–25 milyard dollar aralığında “qanunsuz gəlir” əldə edib.

    Elon Musk ilə OpenAI arasındakı hüquqi mübahisə 2024-cü ilin martında başlayıb. Həmin vaxt xAI şirkətinin rəhbəri olan Musk, OpenAI-ın ilkin missiyasını pozduğunu iddia edərək məhkəməyə müraciət etmişdi. Sonradan Microsoft da iş üzrə cavabdeh tərəf kimi əlavə olunub. Musk həmçinin OpenAI-ın korporativ strukturunu dəyişmək cəhdlərinə qarşı məhkəmə qadağası almağa çalışıb. Bundan başqa, Musk OpenAI-ı Apple ilə birlikdə başqa bir işdə də ittiham edir. Həmin iddiaya görə, bu şirkətlər App Store siyasətləri vasitəsilə xAI üçün ədalətsiz rəqabət mühiti yaradır.