“Fambot” ailələrin gündəlik işlərini süni intellektlə idarə edir

    “Fambot” ailələrin gündəlik işlərini idarə etməyə kömək edən süni intellekt xidmətini təqdim edib. Valideynlər üçün “AI chief of staff” adlandırılan xidmət məktəb tədbirlərini, məşğələləri və digər ailə planlarını vahid yerdə izləyir. Startapı keçmiş “Instagram” mühəndisi Greg Karlin, baş direktor David Reich və “Google” ilə “LinkedIn” şirkətlərinin keçmiş əməkdaşı Jason Morrow yaradıb. Reich daha əvvəl “UnitedMasters” şirkətinin prezidenti olub və 250 nəfərlik “Uber Transit” komandasına rəhbərlik edib.

    İstifadəçilər elektron poçt hesablarını, təqvimlərini və vacib “WhatsApp” qruplarını “Fambot” xidmətinə qoşa bilirlər. Xidmət bu mənbələrdən gələn məlumatları emal edir, hər gün görüləcək işlərin siyahısını hazırlayır və qarşıdakı tədbirləri öncədən göstərir. Məqsəd yalnız suallara cavab vermək deyil, ailənin yaxın günlərdə qarşılaşacağı tapşırıqları vaxtında xatırlatmaqdır. David Reich ideyanın axşamlar təxminən 40 məktubu nəzərdən keçirməyə vaxt sərf etməsindən yarandığını deyib.

    “Fambot” bir neçə süni intellekt modelindən birlikdə istifadə edir və şirkətin sözlərinə görə, bu modellər istifadəçi məlumatları ilə öyrədilmir. Xidmətlə mətn mesajları, mobil tətbiq və veb interfeys üzərindən əlaqə saxlamaq mümkündür. Gələcəkdə məktəblərin, idman komandalarının, dərnəklərin və klubların istifadə etdiyi tətbiqlərin də sistemə qoşulması planlaşdırılır.

    İstifadəyə verilməzdən əvvəl xidməti mindən çox ailə sınaqdan keçirib. Sınaqlar göstərib ki, “Fambot” yalnız hər iki valideynin işlədiyi böyük ailələrə deyil, tək uşaqlı və tək valideynli ailələrə də maraqlıdır. David Reich ABŞ ərazisində 16 yaşdan kiçik uşaqları olan 43 milyon ailənin yaşadığını və xidmətin geniş auditoriyaya ünvanlandığını bildirib.

    Startap ilkin mərhələdə “NextView Ventures” və “Baukunst” şirkətlərinin rəhbərlik etdiyi investisiya raundunda 3,5 milyon dollar (təxminən 5 milyon 950 min manat) cəlb edib. Raunda “Correlation Ventures”, “Karman Ventures” və “Founders Network” də qoşulub. “Fambot” hazırda “iOS”, “Android” və vebdə beta mərhələsində pulsuzdur. Sonrakı qiymətin “Netflix” abunəliyinə yaxın olacağı gözlənilir.