Google ChatGPT və Claude-a ağıllı ev cihazlarını idarə etmək imkanı verir

    “Google” ağıllı ev cihazlarını süni intellekt agentlərinə bağlayan “Home MCP” inteqrasiyasını açmağa başlayıb. Sistem “Model Context Protocol” adlı standartla işləyir və “Google Antigravity”, “Claude”, “Hermes”, “OpenClaw” və “ChatGPT” kimi alətləri dəstəkləyir. Bu agentlər “Google Home” sistemindəki cihazları idarə edə və əvvəlki hadisələrə baxa bilir. Göstərişləri gündəlik danışıq dilində yazmaq kifayətdir.

    “Home MCP” “Nest” kameraları və qapı zəngləri, “Nest Thermostat”, “Matter” lampaları, eləcə də “Works with Google Home” uyğun cihazlarla işləyir. Sistem müxtəlif kameraların görüntülərini birlikdə təhlil edə bilər. Məsələn, uşağın məktəbdən qayıtdıqdan sonra nə etdiyini ümumiləşdirib uyğun videoları göstərə bilər. Ev tarixçəsinə baxaraq işıqların nə qədər açıq qaldığını və paltaryuyan maşının həftə ərzində neçə dəfə işlədiyini də müəyyənləşdirir. Agent qoşulmuş cihazları idarə edə bilir.

    Sistem səsli əlaqəni də dəstəkləyir. Agent tapşırığı bitirəndə “Google Home” səsgücləndiricisindən səsli mesaj göndərə bilər. İstifadəçi adi göstəriş yazaraq ehtiyacına uyğun idarəetmə paneli də yarada bilər. Kamera xülasələrini, cihazların vəziyyətini və idarəetmə düymələrini eyni ekranda toplamaq olur.

    “Google” təhlükəsizlik üçün sorğu sayına məhdudiyyət və əlavə qoruma tədbirləri qoyub. Məsələn, sistem qapıların kilidini açmağa icazə vermir. Bununla yanaşı, şirkət seçilən agentdən asılı olaraq gözlənilməz və arzuolunmaz davranışların baş verə biləcəyi barədə xəbərdarlıq edir. İstifadəçilərə bağlantı qurmazdan əvvəl tərtibatçı qaydalarını və xidmət şərtlərini yoxlamaq tövsiyə olunur.

    “Home MCP” ilkin mərhələdə ABŞ-də yalnız ingilis dilində açılır. Xidmətdən “Google Home Premium Advanced” abunəçiləri yararlana biləcək. Paket aylıq 20 dollar (təxminən 34 manat), illik 200 dollar (təxminən 340 manat) qiymətinə satılır. Xidmət qarşıdakı həftələrdə istifadəçilər üçün mərhələli şəkildə açılacaq. Digər abunə paketlərinə və bazarlara nə vaxt gələcəyi bilinmir. Abunəliyə uzun video tarixçəsi, ətraflı bildirişlər, video axtarışı və gündəlik xülasələr daxildir.

    Quraşdırma zamanı “Google Cloud” layihəsi yaratmaq və “Home MCP” inteqrasiyasını aktivləşdirmək lazımdır. Daha sonra sazlama məlumatları seçilmiş agentə əlavə olunur. Agent istifadəçidən hesabına daxil olmağı və lazımi icazələri təsdiqləməyi istəyir. Yeni inteqrasiya “Gemini for Home” köməkçisini əvəz etmir. O, üçüncü tərəf agentlərinin ağıllı ev cihazlarını idarə etməsi üçün ayrıca bağlantı yaradır. MCP standartı “Google Cloud”, məlumat platformaları, tərtibatçı alətləri və “Google Workspace” daxilində də işləyir. İlk istifadəçilərin rəyləri “Smart Home for Developers Community” üzərindən toplanacaq.