Google Gemini 3.1 Pro modelini təqdim etdi

    Technote.az “TechCrunch” platformasına istinadən bildirir ki, Google süni intellekt sahəsində növbəti böyük addımını ataraq Gemini Pro modelinin ən yeni versiyası olan Gemini 3.1 Pro-nu təqdim edib. Şirkətin açıqlamasına görə, model hazırda preview mərhələsindədir və yaxın vaxtlarda geniş istifadəyə veriləcək.

    Yeni versiya əvvəlki Gemini 3 modelindən əhəmiyyətli dərəcədə güclüdür. Qeyd edək ki, Gemini 3 ötən ilin noyabr ayında təqdim olunarkən artıq bazarın ən bacarıqlı böyük dil modellərindən biri hesab olunurdu. Lakin Gemini 3.1 Pro performans göstəricilərinə görə onu da geridə qoyur. Google tərəfindən paylaşılan müstəqil benchmark nəticələrinə əsasən model müxtəlif testlərdə, o cümlədən “Humanity’s Last Exam” kimi çətin qiymətləndirmə sistemində əvvəlki versiyadan xeyli üstün nəticələr göstərib. Bu testlər modelin məntiqi düşünmə, kompleks analiz və çoxmərhələli tapşırıqları yerinə yetirmə bacarığını ölçür.

    Bundan əlavə, süni intellekt startapı Mercor-un baş direktoru Brendan Foody bildirib ki, şirkətin real peşəkar tapşırıqları ölçən APEX sistemi üzrə Gemini 3.1 Pro artıq agent modelləri arasında lider mövqeyə yüksəlib. Onun sözlərinə görə, bu nəticə süni intellekt agentlərinin real bilik əsaslı işlərdə necə sürətlə inkişaf etdiyini göstərir.