Gemini avtomobildə şəxsi məlumatlardan yararlanacaq

    “Google” avtomobillərdəki “Gemini” süni intellekt köməkçisinə “Personal Intelligence” funksiyasını əlavə etməyə başlayıb. Köməkçi bununla “Gmail”, “Google Calendar”, “Maps”, “Photos”, “YouTube” və axtarış tarixçəsindəki məlumatlardan yararlana biləcək. Cavablar sürücünün planlarına, seçimlərinə və əvvəlki fəaliyyətinə uyğun hazırlanacaq.

    Funksiya həm “Android Auto”, həm də avtomobilə birbaşa quraşdırılan “Google Built-in” sistemində işləyəcək. “Android Auto” telefondakı naviqasiya, musiqi və mesajları avtomobilin ekranına ötürür. “Google Built-in” isə “Android Automotive” əsasında işləyir və “Android” tətbiqlərini birbaşa avtomobildə açır. Sürücü əmrləri adi danışıq dilində verə biləcək. Ünvanı tam deməsə belə, köməkçi onu elektron poçtdan, fotodan və ya “Maps”də saxlanmış məkanlardan tapa biləcək.

    Məsələn, sürücü hava limanına gedərkən uçuş qapısını və reysin gecikib-gecikmədiyini eyni anda soruşa bilər. “Gemini” təsdiq məktubunu “Gmail”də tapacaq və uçuşla bağlı son məlumatları yoxlayacaq. Köməkçidən həkim qəbuluna yol göstərmək, ötən həftə çəkilmiş fotodakı avtomobil yuma məntəqəsini tapmaq və ya dünən danışılan qəhvəxanaya aparmaq da istənilə bilər. Restoran axtarışı zamanı sistem vegetarian yemək seçimi kimi əvvəlki üstünlükləri də nəzərə alacaq.

    “Personal Intelligence” yalnız istifadəçinin icazəsindən sonra işləyir. Telefonun “Gemini” tətbiqində bu ayar əvvəlcədən aktivdirsə, funksiya “Android Auto”ya avtomatik əlavə olunacaq. İstifadəçi hansı tətbiqlərin qoşulacağını ayrıca seçə və funksiyanı istənilən vaxt söndürə bilər. Avtomobilə quraşdırılmış sistemdə fərdi cavablar yalnız telefon avtomobilə qoşulu olduqda göstəriləcək. Funksiya söndürülsə də naviqasiya, musiqi, zənglər və ümumi suallar əvvəlki qaydada işləyəcək.

    Funksiyanın “Android Auto”ya əlavə olunmasına artıq başlanıb. Yenilik yaxın aylarda “Google Built-in” sistemli avtomobillərə də gələcək. “Google” “Gemini” köməkçisini ötən ilin noyabrında “Android Auto”ya, zavod sistemlərinə isə apreldə gətirmişdi. “Ford”, “GM”, “Honda”, “Nissan”, “Volvo” və “Polestar” artıq bu sistemin quraşdırıldığı yeni avtomobillər satır. “Personal Intelligence” martda ABŞ-də açılıb, digər bazarlarda isə hazırda beta mərhələsindədir.