Grammarly real müəlliflərin adlarından istifadə etdiyi AI funksiyasını dayandırdı

    Technote.az “Mashable” platformasına istinadən bildirir ki, Grammarly real jurnalist və müəlliflərin adlarından icazəsiz istifadə etdiyi iddia edilən süni intellekt funksiyasını dayandırdıqdan sonra hüquqi problemlərlə qarşılaşıb. Şirkət hazırda müəlliflərin kimliklərini kommersiya məqsədilə istismar etməkdə ittiham olunduğu kollektiv məhkəmə iddiası ilə üzləşir.

    “Expert Review” adlı AI funksiyası ötən ilin avqustunda təqdim edilmişdi və istifadəçilərə yazılarına peşəkar rəy təqdim etdiyini iddia edirdi. Funksiya Grammarly-nin həm pulsuz, həm də aylıq 12 dollarlıq Pro planlarında mövcud idi. Şirkətin həmin vaxt yaydığı məlumata görə, alət “mövzu üzrə ekspertlərin və etibarlı nəşrlərin məlumatlarına əsaslanaraq” istifadəçilərə fərdiləşdirilmiş tövsiyələr verirdi. İstifadəçilər hətta rəylərin hansı “ekspertlərin” adından təqdim olunacağını da seçə bilirdi.

    Sonradan məlum olub ki, sistem real şəxslərin, o cümlədən məşhur yazıçı və akademiklərin adından AI tərəfindən yaradılmış məsləhətlər təqdim edib. Bildirilir ki, bu siyahıya həm yaşayan, həm də vəfat etmiş şəxslər daxil idi. Grammarly istifadəçi bələdçisində bunun yalnız “məlumat xarakterli” olduğunu və həmin şəxslərlə rəsmi əlaqə olmadığını qeyd etsə də, tənqidçilər bunun istifadəçilərdə yanlış təsəvvür yaratdığını bildirib.

    Bir çox müəllif və tədqiqatçı onların adlarının icazəsiz istifadə edilməsinə sərt reaksiya verib. Tənqidçilərin fikrincə, şirkət real insanların nüfuzundan istifadə edərək AI məzmununu daha etibarlı göstərməyə çalışıb və bunu ödənişli xidmətin bir hissəsinə çevirib.

    Artan reaksiyalardan sonra Grammarly rəhbəri funksiyanın müvəqqəti olaraq dayandırıldığını açıqladı və şirkətin yanaşmanı yenidən nəzərdən keçirəcəyini bildirdi. O, istifadəçilər və ekspertlər qarşısında üzr istəyərək, gələcəkdə bu tip funksiyaların daha məsuliyyətli şəkildə hazırlanacağını vurğuladı.