Hakerlər süni intellektdən istifadə edərək ABŞ-nin su infrastrukturunu hədəfə alırlar

    ABŞ-nin təhlükəsizlik qurumları ölkə üzrə su təchizatı sistemlərinə qarşı kiberhücumların artdığı barədə xəbərdarlıq edib. Məlumata görə, hakerlər kritik infrastrukturda istifadə olunan Siemens S7 proqramlaşdırıla bilən məntiq kontrollerlərini (PLC) hədəfə alırlar. ABŞ Kibertəhlükəsizlik və İnfrastruktur Təhlükəsizliyi Agentliyi (CISA), Federal Təhqiqat Bürosu (FBI) və Milli Təhlükəsizlik Agentliyi (NSA) bildiriblər ki, hücumlar Siemens S7 kontrollerlərinin müxtəlif modellərini əhatə edir. Bu qurğular su və kanalizasiya sistemləri ilə yanaşı, enerji, istehsal və kənd təsərrüfatında müxtəlif fiziki proseslərin avtomatik idarə olunması üçün istifadə edilir.

    CISA-nın məlumatına görə, hücumlar ABŞ-də su təchizatı və tullantı sularının idarə olunması sistemlərini hədəfə alan daha geniş kiberhücum kampaniyasının bir hissəsidir. Belə sistemlərin sıradan çıxarılması xidmətlərin dayanmasına, təhlükəsizlik problemlərinə və hətta avadanlıqların fiziki zədələnməsinə səbəb ola bilər. Diqqətçəkən əsas məqam isə hakerlərin hücumlarda süni intellektdən istifadə etməsidir. ABŞ qurumlarının bildirdiyinə görə, hakerlər açıq internet mənbələrindəki məlumatları süni intellekt vasitəsilə analiz edir və zəif sistemlər üçün exploit skriptləri hazırlayırlar. Xüsusilə proqram təminatı yenilənməmiş və ya lazımi səviyyədə qorunmayan PLC-lər hədəfə çevrilir.

    Süni intellekt hakerlərə həm internetə açıq və zəif qorunan cihazları müəyyənləşdirməyə, həm də həmin avadanlıqların necə işlədiyini daha sürətli anlamağa kömək edir. Kritik infrastruktur sahəsində çalışan insidentlərə müdaxilə üzrə mütəxəssis TechCrunch-a bildirib ki, süni intellektin PLC-ləri müəyyənləşdirmək və onlar üçün hücum üsulları hazırlamaq məqsədilə istifadəsi diqqətəlayiqdir. Bununla belə, mütəxəssis vurğulayıb ki, sözügedən sistemlərin bir çoxu onsuz da kifayət qədər zəif qorunur. CISA uzun müddətdir kritik infrastruktur operatorlarına belə idarəetmə cihazlarını birbaşa internetə qoşmamağı tövsiyə edir. Problem xüsusilə kənd və kiçik yaşayış məntəqələrində daha ciddi ola bilər. Çünki burada məhdud resurslarla idarə olunan sistemlər bəzən çox böyük ərazilərin su təchizatına cavabdeh olur.