Instagram həmtəsisçisi Mike Krieger Anthropic-də yeni vəzifəyə keçir

    Technote.az “The Verge” platformasına istinadən bildirir ki, Anthropic rəhbər heyətində dəyişiklik edərək şirkət daxilində fəaliyyət göstərən daxili inkubatoru olan “Labs” komandasını genişləndirir. Şirkətə iki il əvvəl məhsul üzrə direktor (CPO) kimi qoşulan Instagram-ın həmtəsisçisi Mike Krieger artıq bu vəzifədən ayrılaraq Labs komandasının həmsədri olacaq.

    Anthropic-in Labs komandası 2024-cü ilin ortalarında cəmi iki nəfərlə fəaliyyətə başlayıb. İndi isə şirkət bu komandanı böyütmək və əsas diqqəti “eksperimental məhsulların” hazırlanmasına yönəltmək qərarına gəlib. Krieger yeni vəzifəsində Anthropic prezidenti Daniela Amodei-yə birbaşa tabe olacaq və Labs komandasına şirkətin məhsul mühəndisliyi üzrə rəhbəri Ben Mann ilə birlikdə rəhbərlik edəcək. Mike Krieger-in boşaltdığı məhsul rəhbəri postunu isə indiyə qədər “head of product” vəzifəsini icra edən Ami Vora tutacaq. O, Anthropic-in texnologiya üzrə rəhbəri Rahul Patil ilə birlikdə şirkətin əsas məhsullarının, o cümlədən Claude AI platformasının miqyaslanmasına cavabdeh olacaq.

    Şirkət növbəti altı ay ərzində Labs komandasının üzvlərinin sayını iki dəfə artırmağı planlaşdırır. Mike Krieger The Verge-ə verdiyi açıqlamada bildirib ki, süni intellekt sahəsində inkişafın sürəti artıq məhsulların necə istifadə ediləcəyini formalaşdırmaq üçün kritik bir mərhələyə daxil olub və o, bu səbəbdən yenidən “birbaşa məhsul yaradan” rola qayıdır.