Meta cəmi bir neçə gün sonra Muse Image funksiyasını dayandırdı

    Meta istifadəçilərin ciddi narazılığına səbəb olan yeni süni intellekt funksiyası Muse Image alətini istifadəyə verilməsindən cəmi bir neçə gün sonra dayandırdığını açıqlayıb.

    Reuters-in məlumatına görə, keçən həftə təqdim olunan Muse Image istifadəçilərə yeni şəkilləri süni intellekt vasitəsilə redaktə etməyə, dəyişdirməyə və onlara 3D effektlər əlavə etməyə imkan verirdi. Lakin alətin ən çox tənqid olunan xüsusiyyəti ictimai Instagram hesablarında paylaşılmış fotoları generativ AI üçün istinad materialı kimi istifadə edə bilməsi idi.

    Bundan əlavə, bu funksiya standart olaraq aktiv vəziyyətdə təqdim olunmuşdu. İstifadəçilər şəkillərinin AI tərəfindən istifadə edilməsini istəmirdilərsə, ya hesablarını məxfi etməli, ya da bu seçimi ayarlar bölməsindən əl ilə deaktiv etməli idilər.

    Meta cümə günü yaydığı açıqlamada qərarın istifadəçi rəylərindən sonra verildiyini bildirib: “Məqsədimiz insanlara faydalı yaradıcı alət təqdim etmək və ictimai paylaşımlarının bu məqsədlə istifadə olunmasına nəzarət imkanı vermək idi. Lakin aldığımız rəylər göstərdi ki, bu funksiya gözlənilən nəticəni vermədi. Buna görə də Muse Image artıq istifadədə deyil”.