Meta kiçik bizneslər üçün Muse süni intellekt agentini təqdim etdi

    “Meta” istehlakçılar üçün “Muse” süni intellekt agentini çıxardıqdan bir neçə həftə sonra kiçik bizneslər üçün “Muse for Small Business” versiyasını işə salır. Agent biznes sahiblərinin “Meta” platformasındakı peşəkar hesablarına qoşulur. Xidmət əsas ehtiyaclar üçün pulsuz olacaq, lakin daha intensiv istifadə gələcəkdə abunə tələb edə bilər.

    Agent reklam hesabları ilə yanaşı “Facebook” və “Instagram” analitikasına çıxış əldə edir. Toplanan məlumatlarla reklam kampaniyalarını təhlil etmək və sosial şəbəkə hesablarında müxtəlif işləri görmək olur. “Muse” aylıq maliyyə nəticələrini yoxlaya, şübhəli xərcləri aşkarlaya bilər. Həmçinin satış, reklam kampaniyası və sosial media məlumatlarına əsasən növbəti il üçün inkişaf planı hazırlaya bilir.

    “Muse” bir sıra kənar xidmətlərlə də işləyir. Siyahıya “Canva”, “Figma”, “Slack”, “Asana”, “Box”, “Dropbox”, “Notion”, “Shopify”, “Stripe”, “Zoom”, “Intuit QuickBooks”, “Klaviyo”, “Granola”, “HighLevel” və “Lovable” daxildir. Biznes sahibi hesablarını qoşduqda agent həmin tətbiqlərdəki məlumatları bir araya gətirir. Beləliklə, elektron poçt, təqvim, maliyyə və iş prosesləri ilə bağlı daha geniş tapşırıqları yerinə yetirə bilir.

    Bundan 1 gün əvvəl “Meta” iri şirkətlərə süni intellekt xidmətləri satmaq üçün “Meta Enterprise Platform” adlı ayrıca biznes bölməsi yaratmışdı. Bölmə “Muse”, “Meta Business Agent”, “Muse API”, “Muse Code”, qabaqcıl modellər və böyük həcmli texniki infrastrukturu şirkətlərə satmağı planlaşdırır. “Meta” bununla korporativ müştərilər uğrunda “OpenAI”, “Anthropic” və “Microsoft” ilə rəqabəti gücləndirir.

    Ancaq “Muse” istifadəçi məlumatlarına geniş çıxış istədiyindən təhlükəsizlik və etibarla bağlı suallar yaranıb. Ən azı 1 halda agent istifadəçinin şəxsi mesajlarını icazəsiz təhlil edib. Başqa bir hadisədə məhsulun aşağı qiymətə satışını təsdiqləyib və sahibinə xəbər vermədən alıcını onun evinə yönləndirib. Halbuki agent satış və alışın tamamlanması kimi həssas əməliyyatlardan əvvəl icazə istəməli idi.

    “Meta” ötən həftə danışığı mətnə çevirən diktə funksiyasındakı təhlükəsizlik boşluğunu da bağlayıb. Həmin boşluq səs yazısını və hesaba giriş üçün işlədilən doğrulama tokenini hücumçunun serverinə yönləndirə bilirdi. Agentin əsasındakı “Muse Spark” modeli kənar təhlükəsizlik şirkətinin sınağında nəzarətdən çıxaraq başqa şirkətin sisteminə müdaxilə edib. “Muse” təhlükəsiz, bulud əsaslı “Linux” virtual maşınında işləsə də, verilən göstərişləri səhv anlaya bilər.

    “Muse” ABŞ bazarında pulsuz “iOS” tətbiqləri arasında qısa müddətdə ilk pilləyə yüksəlib, amma istifadəçilərin etibarı aşağıdır. 1500 ABŞ istehlakçısı arasında keçirilən sorğuda yalnız 8% parollarını “Meta” şirkətinə etibar edəcəyini deyib. Bu göstərici “OpenAI” üçün 16%, “Apple” üçün 23% olub. “Google” 30% nəticə göstərib. “Amazon” da icazəsiz əməliyyatları qayda pozuntusu sayaraq “Muse” agentinin onlayn mağazaya girişini bloklayıb.