Meta Muse Image təqdim olundu

    Meta süni intellekt sahəsində növbəti addımını ataraq Muse Image adlı yeni şəkil yaratma modelini təqdim edib. Şirkətin Meta Superintelligence Labs bölməsi tərəfindən hazırlanan bu model artıq pulsuz şəkildə Meta AI tətbiqi, Instagram Stories və WhatsApp üzərindən istifadəçilərə təqdim olunur. Muse Image mətn əsasında yeni şəkillər yaratmaq, mövcud fotoları redaktə etmək və müxtəlif vizual effektlər tətbiq etmək kimi imkanlar təqdim edir. İstifadəçilər hazır şablonlardan istifadə edərək ideya əldə edə və bir neçə söz yazmaqla yeni görüntülər yarada bilirlər. Lakin təqdimatdan qısa müddət sonra platformanın ən çox müzakirə olunan xüsusiyyəti məxfiliklə bağlı olub    Yeni funksiya istifadəçilərə ictimai Instagram hesablarının fotolarını süni intellekt vasitəsilə dəyişdirməyə imkan verir. Bunun üçün sadəcə həmin istifadəçini qeyd etmək kifayətdir. AI həmin fotodan istifadə edərək tamamilə yeni görüntü yarada bilir. Bu xüsusiyyət sosial şəbəkələrdə ciddi narahatlıq yaradıb. Bir çox istifadəçi hesab edir ki, insanların fotolarının onların açıq razılığı olmadan AI tərəfindən istifadə edilməsi məxfilik baxımından risk yaradır. Meta isə bildirir ki, istifadəçilər bu funksiyanı hesab ayarlarından deaktiv edə bilərlər. Bununla belə, şirkətin siyasətində qeyd olunur ki, AI vasitəsilə yaradılan bu cür məzmun barədə istifadəçilərə ayrıca bildiriş göndərilmir. Yəni ictimai profilinizdəki şəkillərdən istifadə olunsa belə, bundan xəbəriniz olmaya bilər.