Meta süni intellekt üçün yeni data mənbəyi tapdı

    Technote.az “The Verge” platformasına istinadən bildirir ki, Meta şirkəti süni intellekt sahəsində növbəti addımını ataraq, artıq öz əməkdaşlarının iş zamanı kompüterdə etdikləri hərəkətləri AI modellərinin təlimində istifadə etməyə başlayır. Bu barədə ilk olaraq Reuters məlumat yayıb.

    Məlumata görə, şirkət ABŞ-də çalışan əməkdaşların iş kompüterlərinə “Model Capability Initiative” (MCI) adlı xüsusi proqram quraşdırır. Bu sistem işlə bağlı tətbiqlər və veb-saytlarda istifadəçi davranışlarını qeydə alır. Buraya siçan hərəkətləri, kliklər, klaviatura girişləri və müəyyən hallarda ekran görüntüləri daxildir.

    Meta bildirir ki, toplanan məlumatlar işçilərin performansını qiymətləndirmək üçün deyil, süni intellekt agentlərinin daha effektiv işləməsi üçün istifadə olunacaq. Şirkətin məqsədi AI sistemlərini insan kimi kompüter istifadə etməyə öyrətməkdir. Məsələn, menyular arasında keçid etmək, düymələrə klikləmək və gündəlik iş proseslərini avtomatlaşdırmaq.

    Meta sözçüsü Tracy Clayton-un açıqlamasına görə, bu addım AI modellərin real istifadə nümunələri əsasında daha düzgün və faydalı nəticələr verməsinə kömək edəcək. Şirkət həmçinin bildirir ki, həssas məlumatların qorunması üçün müəyyən təhlükəsizlik mexanizmləri tətbiq olunur və bu məlumatlar başqa məqsədlər üçün istifadə edilmir.

    Şirkət daxilində bu qərara qarşı narazılıq da yaranıb. Bəzi əməkdaşlar bu cür izləmənin narahatlıq doğurduğunu bildirərək sistemdən imtina imkanının olub-olmadığını soruşublar. Meta-nın texnologiya direktoru Andrew Bosworth isə cavabında qeyd edib ki, iş üçün təqdim olunan cihazlarda bu sistemdən imtina etmək mümkün deyil.

    Bosworth-un daxili yazışmada vurğuladığı kimi, Meta-nın uzunmüddətli vizyonu agentlərin əsas işi görməsi, insanların isə onları idarə etməsi və inkişaf etdirməsi üzərində qurulub.