Meta süni intellektlə oyun yaratmağa imkan verən Pocket tətbiqini istifadəyə verdi

    Meta istifadəçilərə süni intellekt vasitəsilə öz mini oyunlarını yaratmağa imkan verən yeni tətbiqini istifadəyə verib. Pocket adlanan tətbiq hələlik rəsmi olaraq elan edilməsə də, iyunun 29-dan etibarən həm iOS, həm də Android platformalarında yayımlanıb. Tətbiqin mövcudluğunu ilk olaraq mobil tərtibatçı və tədqiqatçı Alessandro Paluzzi aşkar edib. Bununla belə, Meta-nın dəstək səhifəsində Pocket-in hələ bütün ölkələrdə əlçatan olmadığı qeyd olunur və tətbiq hazırda ABŞ daxil olmaqla bir sıra regionlarda istifadəçilərə təqdim edilmir.

    Pocket istifadəçilərə mətn əmrləri vasitəsilə interaktiv mini oyunlar və müxtəlif rəqəmsal təcrübələr hazırlamağa imkan verir. Tətbiq özünü "gizmo" adlandırılan yaradıcı layihələrin hazırlanması və paylaşılması üçün platforma kimi təqdim edir. Texnologiya mediası bildirir ki, Pocket tətbiqi Meta-nın bu ilin əvvəlində süni intellektlə interaktiv təcrübələr yaradan Gizmo startapının komandasını işə götürməsinin nəticəsi ola bilər. Bu ehtimalı gücləndirən məqamlardan biri də tətbiqin Google Play Store-da "com.facebook.gizmo" adı ilə qeydiyyata alınmasıdır.

    Son bir ildə Meta süni intellekt texnologiyalarını məhsullarına daha sürətlə inteqrasiya edir. Şirkət artıq Meta AI çatbotu, AI əsaslı məzmun alətləri və yeni yaradıcı platformalar üzərində fəal şəkildə işləyir. Pocket isə istifadəçilərin heç bir proqramlaşdırma biliyi olmadan öz oyunlarını "vibe-coding" yanaşması ilə hazırlamasına imkan verən növbəti addım kimi qiymətləndirilir. Meta hələlik Pocket-in hansı ölkələrdə sınaqdan keçirildiyi və qlobal istifadəyə nə vaxt təqdim ediləcəyi ilə bağlı rəsmi açıqlama verməyib.