Microsoft ABŞ məktəblərində AI qaydalarını 2 federasiya ilə razılaşdırdı

    “Microsoft” ABŞ-nin 2 əsas müəllim federasiyası ilə məktəblərdə süni intellektdən (AI) istifadə qaydalarını razılaşdırıb. Hüquqi qüvvəsi olan razılaşma ABŞ Müəllimlər Federasiyası və Birləşmiş Müəllimlər Federasiyası ilə bir neçə aylıq danışıqlardan sonra əldə edilib. Bu addım məktəblərdə süni intellektin həddindən artıq istifadəsinə qarşı federal qanun qəbul olunmadığı üçün atılıb. Qaydalar ölkə üzrə təhsil müəssisələri üçün keçərli olacaq.

    Razılaşmada əsas diqqət məlumatların qorunmasına ayrılıb. Tələbə və müəllimlərə aid məlumatlardan AI modellərini öyrətmək və ya yaxşılaşdırmaq üçün istifadə qadağandır. Toplanan məlumatlar satılmayacaq, başqa məqsədlə işlənməyəcək və gəlir gətirmək üçün istifadə olunmayacaq. Onların necə saxlanmasına və nə vaxt silinməsinə məktəblər nəzarət edəcək.

    Sinifdə hansı AI alətlərinin işlədiləcəyinə məktəblər özləri qərar verəcək. Bu alətləri hazırlayan şirkətlər məhsuldakı dəyişikliklər, mümkün risklər və toplanan məlumatlar barədə məktəblərə və valideynlərə aydın açıqlama verməlidir. AI sistemləri insan nəzarətində qalmalı, zərərli əməliyyatları bloklamalı və həssas məlumatları qorumalıdır. Qaydalar müəllimləri, şagirdləri və valideynləri əhatə edir.

    Razılaşmaya ekran qarşısında keçirilən vaxtın azaldılması və texnologiyadan yaşa uyğun, balanslı istifadə qaydaları da daxildir. Daha əvvəl Nyu-York şəhərinin məktəb sistemində AI istifadəsinə moratorium qoyulmuşdu. Los-Anceles Birləşmiş Məktəb Dairəsi də oxşar qadağa tətbiq etmişdi. Nyu-York şəhəri azyaşlılar üçün ekran və AI istifadəsini məhdudlaşdıran federasiya qaydalarını da qəbul edib.

    “Microsoft”un vitse-sədri və prezidenti Brad Smith deyib ki, standart ölkədəki bütün məktəb dairələrinə yayılacaq. ABŞ Müəllimlər Federasiyası eyni qaydaların “OpenAI” və “Anthropic” tərəfindən də qəbul edilməsi üçün bu şirkətlərlə danışır. Təşəbbüs müəllimlərin dərs üzərində nəzarətini saxlamağa, şagirdlərin və ailələrin şəxsi məlumatlarını qorumağa yönəlib.