Microsoft direktoru AI təlimini görünməmiş miqyasda oğurluq adlandırıb

    “The New York Times” qəzetinin “Microsoft” və “OpenAI” şirkətlərinə qarşı 3 il əvvəl qaldırdığı müəllif hüquqları iddiasının yeni açılan hissələri daxili etirafları üzə çıxarıb. “Microsoft” şirkətinin tətbiqi elmlər direktoru Brent Hecht 2023-cü ilin yanvarında yazdığı qeydlərdə süni intellekt modellərini öyrətmək üçün böyük həcmdə məlumat toplanmasını görünməmiş miqyasda oğurluq adlandırıb. O, bunu bəşər tarixində ən böyük əmək oğurluğu kimi təsvir edib. Hecht həmçinin generativ süni intellektin həmin materialları hazırlayan insanların işini təhlükəyə atdığını yazıb.

    “Microsoft” daxilində aparılan araşdırmaya görə, “Copilot” cavab sistemi “The New York Times” saytına keçidlərin sayını adi “Bing” axtarışı ilə müqayisədə 93 faizədək azaldıb. Hecht 2024-cü ilin yanvarındakı çıxışında bunu həm süni intellekt modellərinin, həm də internetdəki məlumatların keyfiyyətini aşağı salacaq qapalı dövr adlandırıb. Sənəddə qeyd olunur ki, süni intellekt məhsulları məlumat götürdükləri nəşrlərin gəlir imkanlarına zərər vurur.

    “Microsoft” rəhbəri Satya Nadella ifadəsində deyib ki, ödəniş tələb olunan materiallardan modellərin öyrədilməsi və cavabların hazırlanması üçün lisenziya alınmalıdır. Nadellanın sözlərinə görə, “OpenAI” şirkətinin belə materialları topladığını bilsəydi, modellərin qorunan məlumatlar olmadan yenidən öyrədilməsini tələb edərdi. “ChatGPT” rəhbəri Nick Turley çatbotların nəşrlərin varlığı üçün təhlükə yaratdığını və zamanla orijinal məzmunu daha çox əvəz edəcəyini yazıb. “OpenAI” prezidenti Greg Brockman da modellərin xəbər sahəsində çox güclü olduğunu deyib.

    Açılan sənədlərə görə, “OpenAI” şirkətinin aralıq təlim məlumatlarında “The New York Times”, “Daily News” və “Center for Investigative Reporting” nəşrlərinin əsərlərinə aid 91 692-dən çox nüsxə var. “Common Crawl” məlumatları əsasında hazırlanan başqa topluda təkcə “nytimes.com” saytından 2 milyondan çox sənəd olub. “Project Mango” üçün yaradılan məlumat bazasında xəbər nəşrlərinə aid ən azı 160 903 unikal əsərin surəti də var.

    İddia sənədlərinə görə, materiallar “Bing Index” üzərindən də toplanıb. “OpenAI” bütün “GPT-3” təlim bazasını qiymətləndirilməsi üçün “Microsoft” şirkətinə verib. “Microsoft” da “Project Taxi” və “Project Mango” layihələri çərçivəsində “OpenAI” şirkətinə məlumat ötürüb. Daxili yazışmalarda ödəniş tələb edən səhifələrə aşkarlanmadan daxil olmaq üsulundan danışılır. Həmçinin iddia olunur ki, model müəllif hüququ bildirişlərini istifadəçilərə göstərməsin deyə həmin qeydlər təlim materiallarından qəsdən silinib.

    Mübahisənin əsas mövzusu müəllif hüquqları ilə qorunan materialların süni intellekt təlimində icazəsiz işlədilməsinə “ədalətli istifadə” qaydasının aid olub-olmamasıdır. Bu qayda bəzi hallarda əsərdən müəllifin icazəsi olmadan yararlanmağa yol açır. Məhkəmələr indiyədək əsasən süni intellekt şirkətlərinin mövqeyinə müsbət yanaşıb. Tramp administrasiyası da “OpenAI” şirkətini müdafiə edən sənədi məhkəməyə verib. Yeni sitatların böyük hissəsi iddiaçının yazılı mövqeyindən götürülüb. Əsas sübutlar hələ açılmadığı üçün onların tam hansı kontekstdə yazıldığı bilinmir. “Microsoft” və “OpenAI” açıqlama sorğularına cavab verməyib.