Microsoft özünün sıfırdan hazırlamış olduğu MAI-Image-1 şəkil generatorunu təqdim edib

     Microsoft AI - süni intellekt sahəsində işləyən bölmə - MAI-Image-1 adlı alqoritmi təqdim edib. Bu, şirkət daxilində sıfırdan hazırlanmış ilk mətn təsviri əsasında şəkil yaradan süni intellekt generatorudur. Qısa müddət əvvəl öz ilk süni intellekt modellərini təqdim etmiş proqram təminatı nəhəngi bu yeni şəkil generatorunu “bizim yolumuzda növbəti addım” adlandırıb. Microsoft bildirib ki, o, təkrarlanan və ya şablon üslubda nəticələrdən qaçmaq üçün peşəkar məzmun yaradıcılarının rəyini toplayıb. Şirkətin sözlərinə görə, MAI-Image-1 fotorеalistik şəkillərin yaradılmasında əla nəticə göstərir. Bundan əlavə, alqoritm sorğuları emal edir və şəkilləri daha böyük və daha yavaş modellərlə müqayisədə daha sürətlə yaradır.

     MAI-Image-1 artıq istifadəçilərə müxtəlif neyroşəbəkələrin nəticələrini müqayisə etməyə və ən yaxşılarını seçməyə imkan verən LMArena reytinqində ilk 10-luğa daxil olub. MAI-Image-1 alqoritmi Microsoft-un digər süni intellekt məhsulları - MAI-Voice-1 səs generatoru və MAI-1-preview çat-botu - ilə bir sırada yer alır. Microsoft əvvəllər OpenAI-ın ilk və ən böyük investorlarından biri idi, lakin zaman keçdikcə iki şirkət arasındakı münasibətlər getdikcə mürəkkəbləşib. Bu fonun təsiri ilə Microsoft artıq bəzi Microsoft 365 platforması funksiyalarının işləməsi üçün Anthropic şirkətinin süni intellekt modellərindən istifadə edir və eyni zamanda öz neyroşəbəkələrinin inkişafına böyük həcmdə investisiya yatırır.