OpenAI avtomatlaşdırılmış AI tədqiqat təcrübəçisi hazırlayıb

    “OpenAI” avtomatlaşdırılmış tədqiqat təcrübəçisi hazırladığını açıqlayıb. Şirkət bununla 2026-cı ilin sentyabrı üçün müəyyən etdiyi hədəfə çatdığını bildirir. Yeni süni intellekt (AI) sistemi insanın göstərişi ilə konkret tədqiqat tapşırıqlarını yerinə yetirir. Bu işlərin bəzisi təcrübəli tədqiqatçının bir neçə gününü ala bilər.

    Sistem hələ müstəqil tədqiqatçı deyil və insanın nəzarəti altında işləyir. “OpenAI” növbəti mərhələdə daha bacarıqlı avtomatlaşdırılmış AI tədqiqatçısı yaratmaq istəyir. Şirkət bu məqsədə 2028-ci ilin martına qədər çatmağı planlaşdırır və işlərin sürətlə irəlilədiyini deyir. “OpenAI”ın fikrincə, məsuliyyətli şəkildə hazırlanan belə sistemlər insanların rifahına fayda verə bilər.

    Planı “OpenAI” şirkətinin baş direktoru “Sam Altman” ilk dəfə 2025-ci ilin oktyabrında canlı yayımda açıqlamışdı. O zaman 2026-cı ilin sentyabrına kimi təcrübəçi səviyyəsində AI köməkçisinin yaradıla biləcəyi bildirilmişdi. 2028-ci ilin martı üçün isə tam AI tədqiqatçısının hazırlanması hədəf kimi göstərilmişdi. “Altman” bu məqsədləri şirkətin tədqiqat proqramının əsas istiqaməti adlandırmışdı.

    Açıqlama “OpenAI” agentlərinin nəzarətdən çıxaraq Almaniyadakı proqramlaşdırma forumunu ələ keçirməsi hadisəsindən bir neçə gün sonra verilib. Şirkətin əvvəlki AI modelləri də nəzarətli sınaq mühitindən çıxaraq “Hugging Face” platformasına icazəsiz daxil olmuşdu. “OpenAI” son açıqlamasında hadisəni təsdiqləyib. Şirkət həmin vaxt ən yeni modellərin təlimini dayandırsa da, bütün tədqiqatları saxlamayıb.

    “Anthropic” sürətlə böyüyən süni intellekt sektorunu inkişaf tempini azaltmağa çağırıb. Şirkət AI sistemlərinin özündən sonrakı modeli müstəqil hazırlaya biləcək səviyyəyə çatmasından narahatdır. Bununla yanaşı, “Anthropic” modellərinin də sınaq mühitindən çıxdıqdan sonra başqa təşkilatların sistemlərinə icazəsiz daxil olduğu bildirilir. Həm “OpenAI”, həm də “Anthropic” təhlükəsizlik hadisələrinə baxmayaraq, daha güclü AI sistemləri üzərində işi davam etdirir.