OpenAI ChatGPT-nin Linux tətbiqini istifadəyə verdi

    OpenAI uzun müddətdir Linux istifadəçilərinin gözlədiyi addımı ataraq ChatGPT-nin Linux üçün rəsmi masaüstü tətbiqini təqdim edib. Yeni tətbiq hazırda “preview” mərhələsində bütün dünyada istifadəyə verilir. Şirkətin açıqlamasına görə, Linux ChatGPT-nin masaüstü tətbiqi üçün ən çox tələb olunan platformalardan biri olub. Linux versiyasının təqdim edilməsi ilə ChatGPT və Codex artıq bütün əsas masaüstü əməliyyat sistemlərində əlçatan olur. Yeni tətbiq vasitəsilə Linux istifadəçiləri ChatGPT, ChatGPT Work və Codex xidmətlərindən birbaşa masaüstündən istifadə edə biləcəklər.

    OpenAI ilkin mərhələdə Ubuntu 24.04 və 26.04 LTS, Debian 13, Fedora 43 və Fedora 44 distributivlərinin masaüstü versiyalarını rəsmi olaraq dəstəkləyir. Bu distributivlər əsasında hazırlanmış bir sıra digər Linux versiyalarında da tətbiqin işləməsi gözlənilir. Linux ekosistemində yüzlərlə müxtəlif distributiv olduğu üçün hələlik onların hamısına rəsmi dəstək verilmir. Bununla belə, seçilən Ubuntu, Debian və Fedora Linux dünyasında geniş istifadə olunan və bir çox başqa distributivin əsasını təşkil edən sistemlərdir.