OpenAI ChatGPT-yə geyim sınağı və məhsul saxlama alətləri təqdim etdi

    “OpenAI” 1 oktyabrda “ChatGPT” üçün 2 yeni alış-veriş funksiyasını dünyada istifadəyə verib. Virtual sınaq aləti istifadəçinin fotosuna əsasən geyim və aksesuarların onun üzərində necə görünəcəyini göstərən şəkil yaradır. “Favorites” funksiyası bəyənilən məhsulları sonradan baxmaq üçün saxlayır.

    Virtual sınaq geyim məhsulunun göstərildiyi söhbətlərdə “Try On” düyməsi ilə açılır. Məhsulu seçdikdən sonra selfi və ya bütün bədəni göstərən foto yükləmək olur. “ChatGPT” geyimi fotodakı şəxsə uyğunlaşdırıb yeni şəkil yaradır. Sistem yalnız söhbətdə göstərilən məhsullarla kifayətlənmir, internet səhifəsindən götürülmüş geyim şəklini də emal edir.

    Yeni funksiya sentyabrda təqdim olunan “ChatGPT Images 2.5” modeli ilə işləyir. “OpenAI”-ın məlumatına görə, model işıqlandırmanı daha təbii, parçaların quruluşunu isə daha aydın göstərir. O, şəkil üzərində dəyişikliklərlə bağlı göstərişləri daha düzgün yerinə yetirir və nəticəni daha tez hazırlayır. İstifadəçi istədiyi üslubu yazaraq uyğun geyimlər axtara və ya məşhur şəxsin fotosuna bənzər məhsullar tapa bilər.

    “Favorites” ilə seçilən məhsullar tətbiqin “Library” bölməsində saxlanılır. Virtual sınaq zamanı yaradılan şəkillər də burada görünür. Məxfilik baxımından nəzərə almaq lazımdır ki, şəxsi hesabdan yüklənən şəkillər təlimdə istifadə oluna bilər. Bunu istəməyənlər hesab ayarlarından məlumatlarının model təlimində işlədilməsini söndürməlidirlər.

    Oxşar virtual geyim sınağı “Google Search” xidmətinə 2025-ci ildə əlavə olunub. “OpenAI” daha əvvəl “ChatGPT” daxilində alış prosesini tamamlamaq üçün “Instant Checkout” funksiyasını sınaqdan keçirib, lakin nəticə zəif olduğu üçün onu dayandırıb. Şirkətin sözlərinə görə, əməliyyatlardan pay almır. Bununla belə, söhbətlərdə satıcıların məhsul və xidmətlərini tanıtdığı reklamlar göstərilir.