OpenAI kibertəhlükəsizlik üçün GPT-5.6-Cyber modelini təqdim edib

    Süni intellektdən istifadə edilən kiberhücumların artdığı bir dövrdə OpenAI kibertəhlükəsizlik sahəsi üçün yeni həllərini təqdim edib. Şirkət daha əvvəl istifadəyə verdiyi “Daybreak” adlı kibermüdafiə xidmətini genişləndirib və xüsusi olaraq kibertəhlükəsizlik tapşırıqları üçün hazırlanmış GPT-5.6-Cyber modelini təqdim edib. OpenAI-ın açıqlamasına görə, Daybreak bundan sonra “Blue” və “Red” olmaqla iki səviyyədə fəaliyyət göstərəcək. Hər iki səviyyə təsdiqlənmiş müştərilərə şirkətin məhdud girişli, qabaqcıl kibertəhlükəsizlik modellərindən istifadə imkanı verəcək.

    “Blue” əsasən şirkətlərin gündəlik kibermüdafiə ehtiyaclarına hesablanıb. Buraya kiberinsidentlərə müdaxilə, zərərli proqramların analizi və təhlükəsizlik yeniləmələrinin yoxlanılması kimi imkanlar daxildir. OpenAI bu paketi əksər şirkətlər və təhlükəsizlik mütəxəssisləri üçün başlanğıc səviyyə kimi təqdim edir. “Red” isə daha inkişaf etmiş imkanlara malikdir və əsasən təhlükəsizlik testləri və sistemlərdəki zəifliklərin araşdırılması üçün nəzərdə tutulub. Yeni GPT-5.6-Cyber modeli də məhz bu səviyyənin bir hissəsidir.