OpenAI-nin təhlükəsizlik mütəxəssisi istefa verdi və şirkəti tənqid etdi

    “OpenAI”-da bütün əsas model buraxılışlarını müşayiət edən təhlükəsizlik hesabatlarını hazırlayan David Robinson bu həftə istefa verib. Şirkətdən ayrıldıqdan sonra o, həm “OpenAI”-da, həm də ümumən süni intellekt sektorunda yaranmış iş mədəniyyətini açıq tənqid edib. Robinsonun fikrincə, bu yanaşma riskləri düzgün qiymətləndirməyə mane olur.

    Robinson hesab edir ki, süni intellekt sektorundakı iş mədəniyyətində ciddi problemlər var. Onun sözlərinə görə, şirkətlər özlərinə həddindən artıq güvənir və dayanmadan daha güclü modellər hazırlamağa çalışırlar. Belə nikbinlik mümkün təhlükələrin diqqətdən kənarda qalmasına və ya olduğundan kiçik görünməsinə səbəb olur.

    Keçmiş “OpenAI” əməkdaşına görə, təkcə yeni qaydalar qəbul etmək kifayət deyil. O düşünür ki, qabaqcıl süni intellekt laboratoriyaları atom elektrik stansiyaları və sıx hava limanları kimi ciddi təhlükəsizlik qaydaları ilə işləməlidir. Bir neçə mərhələdən ibarət qoruma sistemi və diqqətli planlaşdırma insan səhvinin fəlakətə çevrilməsinin qarşısını almalıdır.

    Robinson son vaxtlar tanınmış süni intellekt şirkətlərindən ayrılıb təhlükələr barədə danışan mütəxəssislərdən biridir. Jacob Coxon “Anthropic”dən istefa verdikdən sonra süni intellektin onilliyin sonuna qədər bütün insanları öldürə biləcəyini demişdi. Robert O’Callahan, Bilal Chughtai və Josh Engels “Google DeepMind”dan, Joe Benton isə “Anthropic”dən ayrılan digər təhlükəsizlik mütəxəssisləridir.