Sony Music və Warner, Anthropic-i kütləvi müəllif hüququ pozuntusunda ittiham edir

    Sony Music Publishing, Warner Chappell və daha bir çox nəşriyyat şirkəti süni intellekt laboratoriyası Anthropic-ə qarşı ABŞ-ın Şimali Kaliforniya üzrə Federal Məhkəməsində iddia qaldırıb. Şikayətdə şirkət və həmtəsisçilər Dario Amodei ilə Benjamin Mann, müəllif hüququ ilə qorunan əsərləri “qanunsuz torrent, scraping və yükləmə kampaniyası” ilə toplamaqda günahlandırılır. Nəşriyyatlar Anthropic-in minlərlə qorunan musiqi əsərindən istifadə etməklə Claude adlı AI modelini hazırladığını iddia edir.

    Sənədlərdə bu praktika “aşkar oğurluq” kimi təsvir olunur və qeyd edilir ki, məqsəd kommersiya məqsədli süni intellekt məhsulu üçün kontent bazası yaratmaq olub. İddia cümə axşamı gecə məhkəməyə təqdim edilib və Anthropic-in Claude modellərinin müəllif hüququ ilə qorunan materiallar üzərində sistemli şəkildə öyrədilməsi vurğulanır. Şirkətin bu ittihamlara cavabı hələlik ictimaiyyətə açıqlanmayıb.

    Anthropic üçün bu məhkəmə işi ilk belə qalmaqal deyil. Eyni hüquq komandası bu il yanvarda Concord Music Group və Universal Music Group adından ayrıca iddia qaldırıb. Bundan əvvəl Bartz vs Anthropic işində bir qrup müəllif Claude kimi məhsullar üçün əsərlərinin icazəsiz istifadə olunduğunu bildirərək şirkəti məhkəməyə vermişdi. Həmin işdə hakim süni intellektin müəllif hüququ ilə qorunan əsərlər üzərində öyrədilməsinin prinsipcə qanuni ola biləcəyini, amma bu materialların piratlıq yolu ilə əldə edilməsinin qanunsuz sayıldığını qeyd edərək Anthropic-i 1,5 milyard dollar ödəməyə məhkum etmişdi.

    Yeni iddia əvvəlki işlərlə oxşar arqumentlərə söykənsə də, daha geniş miqyaslıdır. Nəşriyyatlar Anthropic-i milyonlarla kitab nüsxəsini, o cümlədən mahnı sözləri və not yazıları olan nəşrləri qanunsuz torrent vasitəsilə toplamaqla “açıq piratlıqda” ittiham edir. Hüquqşünaslar bildirir ki, bu cür praktikalar musiqi industriyası üçün ciddi zərər riskləri yaradır və süni intellekt şirkətlərinin müəllif hüququna münasibətinə dair presedent formalaşdıra bilər.