SpaceX Cursor-u 60 milyard dollara satın alır

    SpaceX süni intellekt əsaslı proqramlaşdırma aləti Cursor-u 60 milyard dollarlıq səhm müqabilində almaq barədə razılığa gəlib. Müqavilənin şirkətin tarixi IPO-sundan cəmi bir neçə gün sonra, 2026-cı ilin üçüncü rübündə tamamlanacağı gözlənilir. Bu satınalma SpaceX-in xAI ətrafında formalaşdırdığı süni intellekt bölməsini gücləndirmək məqsədi daşıyır. Son aylarda müxtəlif qalmaqallar və daxili yenidənqurma prosesi ilə üzləşən xAI üçün Cursor-un əldə edilməsi strateji addım hesab olunur.

    Maraqlıdır ki, Cursor bundan əvvəl Andreessen Horowitz, Thrive Capital və Nvidia kimi investorların iştirakı ilə 2 milyard dollarlıq yeni investisiya raundunu bağlamağa hazırlaşırdı. Bu investisiya şirkətin dəyərini təxminən 50 milyard dollara çatdıracaqdı. Lakin SpaceX-in 60 milyard dollarlıq təklifi nəticəsində həmin plan dəyişib. 2022-ci ildə Anysphere adı ilə yaradılan Cursor son iki ildə AI əsaslı proqramlaşdırma alətlərinin sürətli inkişafı fonunda bazarın ən sürətlə böyüyən startaplarından birinə çevrilib. Şirkət 2024-cü ildə OpenAI-ın startap akseleratorunda iştirak edib və daha sonra ardıcıl investisiya raundları ilə milyardlarla dollar vəsait cəlb etməyi bacarıb.

    SpaceX ilə Cursor arasında əməkdaşlığın ilkin siqnalları ilin əvvəlində görünmüşdü. xAI şirkəti Cursor-un iki aparıcı mühəndisini komandaya cəlb etmiş, daha sonra isə Cursor-un xAI məlumat mərkəzlərindən istifadə etdiyi məlum olmuşdu. Bu əməkdaşlıq qısa müddətdə tam satınalma razılaşmasına çevrilib. Satınalma həm də xAI-da yaşanan çətin dövrə təsadüf edir. Şirkətin bütün həmtəsisçilərinin ayrılması, Grok çatbotunun yaratdığı qalmaqallar və hüquqi problemlər SpaceX üçün risk faktorları kimi qiymətləndirilirdi. IPO sənədlərində də bu risklər xüsusi vurğulanmışdı.

    IPO zamanı investorlar qarşısında təqdim olunan plana əsasən, SpaceX ümumilikdə 28 trilyon dollarlıq bazar potensialı görür və bunun 26 trilyon dollarını süni intellekt sahəsinə aid edir. Cursor-un alınması isə bu iddialı planların həyata keçirilməsində mühüm rol oynaya bilər.